Lingaz y stil dl jornalism da sensaziun: Referat tla Teßmann
La Biblioteca provinziala Teßmann da Balsan organisëia en colaboraziun cun l’assoziaziun “Deutsche Sprache / Zweig Bozen” na sëra d’informaziun dal titul “Lingaz y stil dl jornalism de sensaziun” cun le germanist Andreas Wiesinger che mostrará sö les formes desvalies de publicaziun y les carateristiches tipiches dl jornalism da sensaziun. L’entrada é debann, le referat sará por todësch.
I foliec da sensaziun vëgn ciamó venüs bun dötaurela, ince sce ai á n problem de imaja: sovënz vëgnel colié le jornalism da sensaziun cun na cualité basa dl produt por le consumadú. La „Kronen Zeitung“ y la „Bild“ é por ejëmpl i foliec plü venüs tl’Austria y tla Germania, scebëgn che i dui foliec vëgn sovënz aratá stlec dai leturs instësc. Cara é pa la desfarënzia danter jornalism da sensaziun y jornalism de cualité? Nen vara ma dla cerna dles tematiches o dl lingaz, dl stil y dles formes de presentaziun spezifiches? É la stampa da sensaziun ma bun marcé, da corusc y stupida o tolara ince ite funziuns soziales importantes?
A chëstes domandes ti jará do Andreas Wiesinger dl Istitut de Germanistica dl‘Université da Desproch tratan so referat „Lingaz y stil dl jornalism da sensaziun“ en jöbia ai 9 de aurí dales 20.00 tla Teßmann da Balsan. Le referat sará por todësch.
La Biblioteca provinziala „Friedrich Teßmann“ á süa sënta tla strada Armando Diaz 8 a Balsan, telefon 0471 471814, E-Mail info@tessmann.it; http://www.tessmann.it/
USP
