Dala Junta: Start por l'elaboraziun de na lege sön i apalc nöia
L’Uniun Europeica á aprové dan da un n ann na regolamentaziun cheder nöia dles leges sön i apalc, incö á la Juna provinziala fát n ater vare por ajorné la lege provinziala atuala cun les diretives UE. „Cun la lege nöia ne gnarál nia mudé completamënter la lege atuala – á splighé le presidënt Kompatscher – mo al é n’ocajiun importanta por regolamenté danü chësc setur."
Smendrí la burocrazia y garantí la competitivité dles aziëndes locales y de döt le sistem economich dl Südtirol: chisc é i fins prinzipai dla regolamentaziun provinziala nöia dla lege sön i apalc che gnará laurada fora ti proscims mëisc. „Les diretives nöies dl’Uniun Europeica – á sotligné Kompatscher – nes pita na buna posciblité por regolamenté danü y cun regoles tleres les prozedöres dla surandada di apalc y por les adaté ala realté locala dl Südtirol.“ La Junta provinziala sotlignëia che les poscibilités d’atuaziun a desposiziun dles istituziuns locales ne é nia zënza limic, deache ares mëss tó en conscidraziun na seria de barieres che reverda les competënzes nazionales y europeiches. „Insciö nes gnarál conzedü na certa liberté pro la regolamentaziun di sub-apalc – insciö le presidënt Kompatscher – mo indere ne podará no la Provinzia no le Stat intergní pro la pert sön la concorënza, olache al sará da atué les regoles nöies al intern dl sistem che é en funziun atualmënter.“
Les sfidades prinzipales dla lege provinziala sön i apalc nöia é döes: da öna na pert sarál important da garantí la proteziun dla strotöra economica dl Südtirol, che é metüda adöm da na gran cuantité de piceres aziëndes che ti pita al’aministraziun publica sorvisc y operes de cualité, y dal’atra pert messarál gní scemplifiché les prozedöres de assegnaziun di apalc che vëgn regolamentades a livel statal.
La Junta provinziala á inciarié n grup de esperc dl setur (cun rapresentanc dles Universités de Trënt y Desproch) por mët adöm n documënt de basa dla lege nöia. Ti proscims mëisc gnará la proposta de lege presentada ai rapresentanc dl setur economich por gní spo aprovada cina l’isté dala Junta provinziala y por passé daldô al Consëi provinzial.
rc
