Dala Junta: Le premier Renzi gnará te Südtirol, alplü tert cina mez má
"Alplü tert cina ai 15 de má, mo plü sigü bele ala fin de aurí, gnará le premier talian Matteo Renzi tl Südtirol por sotescrí n’acordanza sön le svilup dl’autonomia südtiroleja“: chësc á anunzié incö (14 de aurí) le presidënt dla Provinzia Arno Kompatscher tratan n’incuntada cun i media do la sentada edemala dla Junta provinziala a Balsan.
Le presidënt dla Provinzia Arno Kompatscher á informé incö, mertesc ai 14 de aurí, i media che al é preodü tles proscimes edemes, alplü tert a mez má, la secunda vijita de Matteo Renzi tl Südtirol, do che le premier talian â tut pert l’isté dl ann passé al convëgn sön l’Europa dles Regiuns al Ciastel Prösels a Fie. „I á telefoné inier cun Matteo Renzi – á dit incö (14 de aurí) le presidënt dla Provinzia Arno Kompatscher – che me á confermé che por la fin dl mëis de aurí, alplü tert por mez má, gnarál te Südtirol por na vijita istituzionala.“
„Tratan l’incuntada cun le premier Renzi él preodü la sotescriziun de n’acordanza danter le Stat y la Provinzia che nes portará nia ma zoruch na seria de competënzes che nes é gnüdes tutes ti ultims 10 agn, mo al sará ince n vare inant por ci che reveda le svilup dl’Autonomia dl Südtirol“, á sotligné le presidënt Kompatscher y á anunzié inant, che al tolará pert ala trascmisciun „Otto e Mezzo“ de Lilli Gruber sön La7 en sabeda ai 18 de aurí por respogn ales critiches atuales dl presidënt dla Regiun Toscana, Enrico Rossi, al’autonomia de govern dl'Aministraziun provinziala dl Südtirol. „Le Statut d’autonomia ne é nia n privilegh dl Südtirol mo al é n dërt de sconanza scrít dant da diretives internazionales y che garantësc na metoda de govern che ne porta nia ma vantaji al’aministraziun locala, mo ince al Stat“, á stlüt jö Kompatscher.
rc
