Detlaraziun dles cutes 2015: Plü vantaji tres la Cherta di sorvisc
Da indoman (15 de aurí) podará i zitadins che fej la detlaraziun dles cutes s’anuzé dl formular 730 bele scrít fora sön la plata internet dl’Agenzia dles entrades. „Tl Südtirol – á splighé l’assessuria Waltraud Deeg – podará i zitadins scemplifiché la prozedöra cun la Cherta di sorvisc.“
Por scemplifiché la compilaziun dla detlaraziun dles cutes ti pita le govern statal a sü zitadins la poscibilité da s’anuzé de n formular spezial 730 bele scrít fora y che an podará desciarié da indoman, 15 de aurí, dala plata internet dl’Agenzia dles entrades. La prozedöra por ciafé i codesc d’azés é indere complicada y lungia. „Tl Südtirol él poscibl da adoré la Cherta di Sorvisc che garantësc n azés scemplifiché ai dac personai. La Provinzia dl Südtirol laora tl vers por tó demez daldöt i stromënc sciöche chertes y aparac eletronics por avëi n azés plü scëmpl ai sorvisc, mo sön livel statal ne é chisc sorvisc nia ciamó desponibls“, spliga l’assessuria por l’aministraziun Waltraud Deeg.
La prozedöra tradizionala por ciafé l’azés ai dac personai prevëiga la registraziun dl zitadin sön la plata internet dl’Agenzia dles entrades cun tëmps de speta lunc por ci che reverda i dac d'azés. „L’adoranza dla Cherta di Sorvisc – sotlignëia Deeg – ti pormët ai zitadins da sparagné tëmp pro la registraziun y tratan l’azes ai dac.“ Ince chi che ne á nia ciamó ativé la Cherta di Sorvisc á la poscibilité da stlü jö te n tëmp plü cört la detlaraziun dles cutes co tres la prozedöra statala: pro i ofizi dl Comun podará i zitadins cun na Cherta di sorvisc nia ativa damané do i codesc d’azés che ti gnará mená tres email, cun la registraziun sön la plata internet dl’Agenzia dles entrades él de bojëgn da aspeté che la documentaziun röies tres la posta.
„N ater vantaje dla Cherta di sorvisc é la creaziun de n cunt digital dl zitadin cun chël che al pó s’anuzé de düc i sorvisc online dla Provinzia y di Comuns. Chësc é n vare important tl vers de n’aministraziun publica tres plü moderna y che ti pormët ai zitadins da sparagné tëmp y mesi finanziars“, insciö l’assessuria Deeg. Por plü informaziuns él poscibl da contaté le Call Center (800816836) che respogn a dötes les domandes sön i sorvisc dl eGovernment locai.
rc
