La Junta á conzedü na garanzia bancaria por la cumpra de cuotes ENEL
La Junta provinziala á aprové incö (14/04) le proscim vare dla reorganisaziun dl setur dl’energia dl Südtirol y che reverda la conzesciun de na garanzia bancaria de 276 miliuns de euro por la cumpra dles cuotes ENEL da pert dla sozieté dl’energia provinziala SEL Spa. Implü á la Junta aprové le consëi d’aministraziun dla SEL Spa.
Por mët a desposiziun i mesi finanziars por la cumpra dles cuotes ENEL pro la SE Hydropower ti él gnü conzedü ala SEL Spa, tres na rëi dles banches Banca Imi/Intesa, Mediobanca y Barclays Corporate Banking, n credit de indöt 345 miliuns de euro. La Junta provinziala á aprové incö, mertesc ai 14 de aurí, la conzesciun de na garanzia bancaria cun na soma mascimala de 276 miliuns de euro. L'import complessif dl'operaziun cun l'ENEL é de 400 miliuns de euro, 55 miliuns é bele gnüs paiá por l'implant idroeletrich de San Florian. La garanzia messará gní paiada zoruch te dui agn cun i fic preodüs dal marcé.
Le presidënt dla Provinzia Arno Kompatscher á recordé incö do la sentada dla Junta che „chësc é n vare important por la reorganisaziun dl setur dl’energia y por n refornimënt d’energia efiziënt, autonom y sostenibl a bëgn di zitadins dl Südtirol“. La sotescriziun dl contrat cun ENEL gnará fata indoman (15 de aurí) tla sënta dla SEL Spa. La Junta provinziala á implü aprové incö le consëi d’aministraziun dla SEL AG che sará en funziun cina ala fujiun cun la sozieté AEW.
rc
