Aparac por le sprinzé: Tecniches inovatives por sconé l'ambiënt
„Por l’iroraziun dles coltivaziuns d’agricoltöra cun mesi de proteziun dles plantes él nezesciar da adoré les tecniches plü modernes che é desponibles söl marcé“, chësc á sotligné l’assessur por l’agricoltöra Arnold Schuler, recordan che le Südtirol é a n bun punt.
Di 4.500 aparac da sprinzé istalá sön mascins agricoles (mo che ne fej nia pert de traturs o veicui da cioi) registrá tla Provinzia e Balsan, nen n’él söporjö 1.000 che anüza les tecniches plü modernes a desposiziun söl marcé. Lapró röiel ciamó 500 aparac da sprinzé che é tl gní ajorná o che é sön la lista por gní ajorná. Dötadöm reverda chësta operaziun de ajornamënt n cost por la Provinzia dai 15 ai 18 miliuns de euro. I implanc da sprinzé vëgn controlá tresfora te Südtirol.
„Chësc ajornamënt – insciö spliga l’assessur provinzial por l’agricoltöra Arnold Schuler – é n investimënt important por n svilup costant y por porté l’agricoltöra a na coltivaziun plü sostenibla ince dal punt de odüda dl ambiënt, n aspet sön chël che la popolaziun é tres plü sensibla.“
L’adoranza dles tecniches da sprinzé nöies cun sistems de dejintossiamënt automatics pormët n’iroraziun plü sensibla. Cinch dites se fistidëia tl Südtirol dla produziun de aparac por sprinzé cun standarg de produziun moderns. Dal 1 de messé dl 2014 él en forza prescriziuns prezises sön l’adoranza de mesi por la proteziun dles plantes y che la Provinzia de Balsan á atué te na manira plü ampla en confrunt al plann d’aziun nazional. Sciöche l’assessur Schuler sotlignëia „é un di obietifs primars chël da adoré les tecniches plü inovatives y modernes pro la proteziun dl ambiënt y dles plantes.“
rc
