Fondaziun UNESCO: OK por n regolamënt unitar dl trafich söi jus
Ciamó en chësc ann dessel gní ciafé na soluziun ala mobilité tles Dolomites cun n regolamënt unitar dl trafich söi jus danter les Provinzies y Regiuns interessades. Chësc é gnü stabilí incö, jöbia ai 23 de aurí, te na sentada dl Consëi de fondaziun Dolomites UNESCO a Cortina, a chëra che al á tut pert ince i assessurs Richard Theiner y Florian Mussner.
Un di punc scric dant dal UNESCO por sconé le patrimone natural dl'umanité dles Dolomites é chëra che la Fondaziun Dolomites UNESCO mëss lauré fora cina la fin dl 2015 na strategia por n turism sostenibl y cina le 2016 n proiet de planificaziun dl svilup tl dagní adöm ala partezipaziun dla popolaziun dl post. Tl 2016 él ince preodü na valutaziun dl ademplimënt a chëstes döes oblianzes da pert de esperc dl UNESCO cun na vijita tles Dolomites. „Insciö él incö gnü analisé dantadöt le trú por realisé adöm les oblianzes che messará gní tignides ite y le Südtirol é chiló bele a n bun punt“, á sotligné l’assessur por l’ambiënt Richard Theiner incö (23/04) do la sentada dl Consëi de Fondaziun dl UNESCO a Cortina, a chëra che al á ince tut pert l’assessur por la mobilité Florian Mussner, adöm ai responsabls di seturs dl’ambiënt y dla mobilité dles cinch Provinzies y dles döes Regiuns dl Friul-Aunejia-Iulia y dl Venet.
Öna dles tematiches zentrales é stada incö chëra dla mobilité y dl trafich sön i jus dles Dolomites, tematica che é ince gnüda analisada dal EURAC te n stüde che ti é gnü presenté incö al Consëi dla Fondaziun. „I mëmbri dl Consëi dla Fondaziun á stabilí insciö che al gnará tut ciamó inann na dezijiun por regolamenté deboriada le trafich sön i jus dles Dolomites tolon en conscidraziun le plü che ara va les esigënzes dl’economia locala“, insciö Theiner. „Sce les strades di jus coliëia plü provinzies y regiuns spó él nezesciar da ciafé na soluziun unitara düc deboriada, atramënter ne vara nia“, á sotligné inant l’assessur por la mobilité Florian Mussner. Tratan la sentada dl Consëi de Fondaziun él gnü aprové implü le bilanz dl 2014 y che pormët insciö da partí sö i 100.000 euro che ti speta a vigni comëmber dla Fondaziun por les ativités dl ann 2015.
rc
