Dala Junta: Diretives nöies por na proposta de lege tl setur dl’urbanistica
La lege provinziala nöia sön le svilup dl teritore y dla sconanza dl paesaje dess ester tlera y saurida da capí, cun limic definis avisa che reverda la costruziun de frabicac te zones ciamó desponibles y valorisan le plann tecnich di ënc de consulënza. Chësc á sotligné incö (28/04) l’assessur provinzial Richard Theiner do la sentada dla Junta provinziala.
Por cater mëisc á i esperc dl’aministraziun publica y dl setur dl’edilizia lauré adöm a profescionisć lëdi por mët adöm na basa de propostes por la lege nöia sön le svilup dl teritore y dl paesaje. Incö (28 de aurí) él gnü presenté la proposta dla lege nöia ala Junta provinziala che dess gní aprovada, do na discusciun ampla cun düc i interessá, cina d’otober dl 2017. „Le Südtirol fej pert por le momënt dles regiuns plü riches d’Europa, mo i messun lauré inant por ciafé respostes adatades ai mudamënc y i svilups che nes aspetará tl dagní y che reverda le svilup demografich, le smendrimënt dla popolaziun ti raiuns dalunc dales cités, l’imigraziun, la svenüda dl teritore y l’orientamënt dles imprejes“, á dit incö l’assessur Richard Theiner do la sentada dla Junta. Por l’elaboraziun dla pröma proposta él gnü lauré sön n valgügn punc che reverda danter l’ater n valgügn dac: insciö é la spersa dl Südtirol de 740.000 hectars, le 60 porcënt é da ciafé sura i 1.600 metri cun les arees naturales y sconades (biotops, parcs naturai, parch nazional, zones de paesaje sconades) che fej fora prësc le 40 porcënt dla spersa provinziala. Püces sará indere les sperses che podará gní anuzades por la costruziun de frabicac.
Tolon en conscidraziun chësta situaziun él gnü lauré fora n dessëgn de lege che dess ester tler y saurí da capí y che ais sciöche priorité la regolamentaziun dles tematiches de interés publich, por smendrí la burocrazia y renforzé le pëis dl interés publich. Dantadöt gnarál lauré sön na maiú cooperaziun danter i zitadins, i grups d’interés y i Comuns interessá.
Le paesaje cultural y natural é de gran valur por le Südtirol, la süa conservaziun é insciö de importanza fondamentala, á recordé Theiner. Tres l’elaboraziun de limic d’insediamënt tlers dessel gní stabilí regoles prezises pro l’assegnaziun de zones por frabiché nöies. Tres le moto „maiú flessibilité al’intern dles zones, regoles prezises defora“ ará i Comuns plü liberté de gestiun de sües arees al’intern dles zones d’abitaziun. Defora da chëstes zones ne dessel nia plü gní conzedüs proiec che ne tëgn nia cunt dla natöra y dl paesaje. Tl dagní sará ince le zitadin damané da avëi na maiú responsabilité personala. Sce chëstes mosöres, che é inserides tla pröma proposta de lege, é veramënter ince begnodüdes dai zitadins y dai grups d’interes gnarál valuté tles proscimes incuntades, olache al gnará presenté les diretives nöies sön le svilup dl teritore.
Les dates é ince bele gnüdes stabilides: cina la fin de jügn dess la Junta provinziala aprové les diretives dla lege nöia sön les svilup dl teritore y dl paesaje, da jügn 2015 cina a otober 2016 (secunda fasa) presentará i tecnics dla Repartiziun provinziala Natöra, paessaje y svilup dl teritore, adöm a n grup d’esperc, n dessëgn de lege che dess gní aprové dala Junta provinziala y dal Consëi provinzial alplü tert tl mëis de otober dl 2017 (terza fasa).
Les diretives nöies gnará presentades plü avisa
endoman (mercui ai 29 de aurí)
dales 17
tl Zënter pastoral
plaza Duomo 2
a Balsan
dal assessur por l’ambiënt Theiner y dal diretur dla Repartiziun provinziala Natöra, paessaje y svilup dl teritore Anton Aschbacher.
rc
