Nepal: Dala Provinzia n pröm aiüt de 50.000 euro do le tremoroz
La Junta provinziala mët a desposiziun 50 mile euro por n pröm intervënt de prescia tla fasa d’emergënza atuala do le tremoroz che á toché dassënn le Nepal. Tles proscimes edemes gnarál ejaminé plü mosöres de sostëgn por ti garantí n aiüt costant ala popolaziun locala.
Cun n pröm finanziamënt de 50.000 euro dëida la Junta provinziala, en colaboraziun cun le Minister dl ester y tres le partner dla Crusc Cöcena dl Nepal, cun n sostëgn finanziar de prescia do le tremoroz che é sozedü tl Nepal. D’atres mosöres de sostëgn ala popolaziun dl Nepal – les porsones zënza ciasa vëgn calcolades zirca un n miliun – gnará ejaminades tles proscimes edemes.
Tres la cooperaziun al svilup á la Provinzia de Balsan y le Nepal costruí n liam de colaboraziun sterch da plü agn. Le sostëgn ala cresciüda soziala y economica dl Paisc dl Himalaya é sté un di punc zentrai dl program dla cooperaziun internazionala dla Provinzia de Balsan. Tla perioda dal 2000 al 2014 él gnü finanzié indöt complessivamënter 23 proiec de organisaziuns (danter chëstes les assoziaziuns Pro Nepal, Ethical Project, Associazione Beppe y Rossana Mantovan) y coordiná dala Provinzia por indöt 800mile euro.
Por le momënt sostëgn la Provinzia tl Nepal dui proiec de dorada plurianuala ti seturs dla proteziun zivila y dl socurs alpin: un reverda n’acordanza dl 2011 cun le govern dl capolüch Kathmandu por la formaziun y l’ajornamënt dl sorvisc cuntra le medefüch dla cité che cumpëda 2,5 miliuns abitanć cun n numer dër pice de stödafüch y che á n’atrezadöra che messass gní modernisada. La Provinzia á metü a desposiziun 150mile euro por mascins y autos da destodé y por sostigní la formaziun dl personal local.
N ater proiet reverda la costruziun de n rëi efiziënta dl socurs alpin, che vëgn finanziada dala Provinzia cun 130mile euro y che prevëiga la formaziun de n grup de operadus spezialisá tl pröm aiüt cun medejines sö por munt. Chësc proiet vëgn a se le dé tres na colaboraziun cun l’Istitut de medejina d’emergënza dl Eurac y cun la Lia da Munt dl Südtirol. Tl 2012 él rové tl Südtirol n grup de 10 doturs y 9 sherpa dal Nepal por tó pert a plü cursc spezialisá.
rc
