Dala Junta: trilinguism, l’ejam de ladin se renovëia
Do le bilinguism tochera sëgn ince ala pert ladina dl ejame de trilinguism. L'ejam de ladin gnará insciö adaté al cheder de referimënt di lingac europeich y gnará partí sö tl dagní te trëi perts (scrit, da ascuté sö y a usc). Por ci che reverda le scrit ne sarál nia plü la medema proa por A y B, chësc á stabilí da püch la Junta provinziala.
Tla Provinzia de Balsan él atualmënter presciapüch 250 porsones al’ann che fej l’ejam de trilinguism y che vel sciöche atestat por la conescënza dl lingaz ladin. I criters por l’organisaziun dl ejam é gnüs stabilis tl 2002 y cun la reorganisaziun dles proes dl bilinguism él gnü damané da adaté ince l’ejam de ladin al cheder europeich de referimënt di lingac. La Junta provinziala á aprové te süa sentada ai 28 de aurí le conzet nü sön proposta dl presidënt dla Provinzia Arno Kompatscher. „L’obietif – á splighé le presidënt Kompatscher y l’assessur ladin Florian Mussner – é chël da modernisé l’ejam, aladô di standarg linguistics nüs y da valorisé le lingaz dla uma dla mendranza ladina.“
Le proiet é gnü elaboré dai mëmbri dla comisciun dl ejam (dantadöt dai esperc dl setur Paul Videsott y Rut Bernardi) y dal Istitut cultural „Micurà de Rü“ y al é la basa por n’acordanza cun le Comissar dl Govern.
L’ajornamënt di criters y le conzet aprové dala Junta reverda concretamënter n ejam che sará partí sö te trëi proes y nia ma plü te döes, cun l’inserimënt dla proa da ascuté sö, che é nöia ince pro l'ejam de bilinguism. La proa da ascuté sö sará partida sö te cater domandes cun n test da ascuté de zirca 1,5 menüc y che podará gní ascuté ma un n iade. Por ci che reverda le scrit é la novité prinzipala chëra che al gnará desfarenzié danter la proa scrita di liví A y B, por le momënt é le test d'ejame dles döes proes le medemo. Le punt zentral dles proes scrites ne sará nia plü la traduziun di tesć mo la produziun de tesć da pert dl candidat instëss. Por ci che reverda les proes a usc gnará les ejaminaziuns strotorades aladô de tematiches prezises sön chëres che i candidac messará svilupé sües respostes.
La valutaziun dles proes gnará adatada al cheder de referimënt di lingac europeich y ará le focus, sides dla proa scrita co de chëra a usc, sön trëi aspec: la comprenjiun dles esposiziuns, l’adoranza dl lessich y la coretëza dl’adoranza dl lingaz. Les prömes proes aladô di criters nüs gnará tignides tratan le 2016.
rc
