Acordanza sön l'ampliamënt dla rëi dles ferates: Vare important
La rëi dles scines y dles staziuns dles ferates dl Südtirol vëgn ampliada y modernisada, dantadöt les linies che porta a Maran y tla Val de Puster, mo ince la linia dl Prener. La basa é gnüda stabilida incö (04/05) cun la sotescriziun de n’acordanza danter le presidënt dla Provinzia Arno Kompatscher y le suranstant dla RFI Maurizio Gentile a Maran.
„Cun la sotescriziun de chësta acordanza cheder danter la Provinzia y RFI únse confermé l’orenté frëma da orëi lauré inant tla direziun dl ampliamënt dla rëi dles ferates locala y insciö podunse mët da jí la planificaziun de de plü proiec concrec“, á splighé le presidënt dla Provinzia Arno Kompatscher che á firmé l’acordanza adöm al suranstant dl’Aziënda de gestiun dla rëi dles ferates dla Talia (Rete ferroviaria italiana, RFI) Maurizio Gentile. „Les firmes da incö é la garanzia de n salt de cualité dl trasport sön scines dl Südtirol“; insciö Kompatscher.
L’assessur por la mobilité Florian Mussner vëiga l’acordanza sciöche n vare important por la planificaziun futura dla rëi dles infrastrotöres dla mobilité tl Südtirol. „Le conzet dla mobilité é zentral por n raiun de munt deache al garantësc l’azes sides al’intern dles regiuns alpines co ince internazionales y chësc é la fondamënta por n bun funzionamënt dl’economia, dla sozieté, dl turism y de n barat cultural. Öna de nostes priorités resta insciö l’ampliamënt dla linia dles ferates y chësta acordanza é n vare important te chësc vers.“
Tratan la conferënza a Maran ne él insciö nia ma gnü traté les perspetives poscibles dles ferates regionales, mo al é ince gnü definí concretamënter na seria de mosöres strategiches por le dagní. Insciö é un di punc dl’acordanza l’ampliamënt dl trafich sön la rëi dles scines locala. „Chësc nes dá la poscibilité da aumenté i iadi dles ferates tles trates plü importantes y da frabiché de plü architades“, recorda le presidënt Kompatscher. L’acordanza danter la Provinzia dl Südtirol y RFI prevëiga sciöche pröm vare la creaziun de n grup de laur tecnich cun l’obietif da mët da jí de plü proiec y da definí le finanziamënt de chisc.
Danter les priorités di proscims agn, insciö le presidënt Kompatscher, él l’ampliamënt dla linia da Maran, la costruziun de n tunel sot le Virgl, che dess pormët n’entrada aposta ala ferata da Maran tla staziun d aBalsan, y la costruziun dla varianta de Riga danter la Val de Puster y Porsenú. „Chësta acordanza é le früt de n gran laur. Che i sun stá bugn da ciafé n program de basa adöm a RFI por na strategia futura dla rëi dles ferates locala y é n segnal important por le svilup dla linia dles ferates locala y de döta la mobilité dl Südtirol“, á stlüt jö Kompatscher.
rc
Galaria dales fotografies
