Theiner incunta le minister Galletti: A22, Parch dl Stelvio y ciacia
Les mosöres por le smendrimënt dles emisciuns d’incuinamënt sön y dlungia l’autostrada dl Prener, la reorganisaziun dl Parch nazional dl Stelvio, la proibiziun da jí a ciacia al’intern di parcs naturai: Chisc é stá i temesc prinzipai dl’incuntada danter l’assessur provinzial Richard Theiner y le Minister por l’ambiënt Gian Luca Galletti.
Un di argomënc prinzipai de discusciun danter Theiner y Galletti é sté chël che reverda le pachet de mosöres, aprové l’ann passé dala Junta provinziala, por smendrí l’incuinamënt sön y dlungia la trassa dl’autostrada dl Prener. Danter les propostes portades dant, a chëres che la Junta aspeta ciamó na resposta da pert de Roma, él ince da ciafé l’introduziun de n limit de velozité dinamich tl caje de n superamënt di valurs dac dant de biossido de azot, na proposta che ti é ince gnüda portada dant en chësta ocajiun al minister por l'ambiënt Gian Luca Galletti. „Na dezijiun definitiva – á ajunté le diretur dl’Agenzia por l’ambiënt Flavio Ruffini, che á ince tut pert al’incuntada – foss dër importanta, ince deache i ti ún bele presenté al’Uniun Europeica n proiet che va te chësc vers.“
Tratan l’incuntada che é gnüda tignida a Balsan á l’assessur Richard Theiner ajorné le minister Galletti sön la situaziun che reverda l’organisaziun dl Parch nazional dl Stelvio, tolon ince posiziun sön l’introduziun poscibla de na proibiziun dla ciacia di parcs naturai. „Na proibiziun dla ciacia portass a n dejecuiliber ecologich dles zones sot a sconanza, n fat che ess conseguënzes negatives ince por ci che reverda l’azetaziun dl provedimënt da pert dla popolaziun locala“, á sotligné l’assessur Theiner.
rc
