Kompatscher ti respogn a Salvini: cun Renzi n pat por sconé l’autonomia
Cun le premier Renzi él gnü sotescrit n pat de sconanza dl’autonomia por restabilí les mudaziuns sforzades sö dales mosöres che va zoruch al govern Monti: chësta la prezisaziun dl presidënt dla Provinzia Arno Kompatscher en relaziun ales detlaraziuns dl deputat Salvini che a Balsan â baié de miliarg che Renzi ti ess tut ala Provinzia.
„Le deputat Matteo Salvini dess s’informé damí denant co fá detlaraziuns nia prezises che é ma ponsades por gní adorades tla campagna litala y che ne corespogn nia ala realté“, sotlignëia le presidënt dla Provinzia Arno Kompatscher, ince deache „le premier Matteo Renzi ne ti á nia tut trëi miliarg ala Regiun Trentin-Südtirol, sciöche Salvini dij, mo le pat de garanzia che é gnü sotescrit dales Provinzies de Balsan y Trënt cun le govern de Renzi vá propi tla direziun contrara de proteziun y sconanza dles ressurses finanziares dl’autonomia.“
Kompatscher recorda: „Al é n pat che nes pita la segurëza da programé les ressurses finanziares, y che garantësc implü che les Provinzies ne messará nia plü contribuí ales mosöres statales tl dagní y che partësc insciö sö te na manira plü anfat les spëises finanziares che nes é gnüdes sforzades sö do l’acordanza de Milan y che sará de conseguënza plü bases tl dagní. Les mosöres statales, i orun til recordé al deputat Salvini, va zoruch al govern Monti y ala spending review“, stlüj jö Kompatscher.
rc
