Dala Junta: Consëi d’aministraziun nü por l’ABD Airport SPA
La Junta provinziala á definí incö (12 de má) i componënc nüs dl Consëi d’aministraziun dl ABD Airport Spa, na sozieté inhouse dla Provinzia che manajëia les infrastrotöres, i sorvisc y i implanc dl aeroport da Balsan. Sciöche presidënt nü dl CdA él gnü nominé Otmar Michaeler.
„N Consëi d’aministraziun completamënter nü cun le compit da planifiché na strategia che funzionëia y tres chëra che al sará meso da svilupé inant l’aeroport de Balsan“, chësc á dit le presidënt dla Provinzia Arno Kompatscher do la sentada dla Junta, olache le suranstant dla Junta á ince anunzié i mëmbri nüs. Kompatscher á rengrazié le Consëi d’aministraziun atual dl ABD por le laur che é gnü fat te condiziuns nia saurides. Sciöche presidënt nü dl Consëi d’aministraziun él gnü chirí fora Otmar Michaeler, le suranstant de n’impreja de consulënza globala tl setur turistich dal inom „Michaeler&Partner (FMTG)“ cun döes sëntes a Vahrn y a Vienna. Al se trata de n’impreja cun na gran esperiënza internazionala tla realisaziun y tl svilup de proiec tl setur dl turism.
I atri componënc dl Consëi d’aministraziun nü é Marco Pappalardo, le diretur dla SMG (Südtirol Marketing) che é n espert ti seturs dl marketing y dl posizionamënt dl Südtirol sciöche destinaziun turistica, implü röiel lapró Ester Demetz, vizedireturia dl HGV (Uniun Osć y Ostis) cun stüdi de iurisprudënza de Padova y Trënt y Juliane Messner, cofondaturia dl Stüde Legal ”GEISTWERT Rechtsanwälte Lawyers Avvocati” che é spezialisé te dërt comerzial y consulënza pro tematiches che reverda restrotoraziuns y marcia nüs. Le cuinto mëmber nominé dala Junta é Udo Mall, injenier zivil cun stüdi a Trënt y ala ETH de Zürich y che porta para competënzes tecniches sön les infrastrotöres.
Por le consëi de suraverda él gnü confermé Margit Crazzolara y Thomas Pircher, le componënt nü é indere Günther Schacher. Do les nominaziuns dla Junta ti spetel sëgn al’assembla generala dl ABD (che sará indoman) da fá sü inoms por i Consëis.
rc
