Dala Junta: la Provinzia contestëia les mosöres dla Direziun dles doganes
La Junta provinziala á indô contesté n provedimënt dl'Agenzia dles doganes che ne respetëia nia le Statut d’Autonomia y sües normes d’atuaziun. La Junta provinziala á insciö tut la dezijiun incö (12 de má) da fá recurs cuntra les mosöres stabilides dala Direziun dles doganes. Bele l’ann passé â le TAR azeté le recurs dla Provinzia.
Tl 2014 â la Provinzia contesté n provedimënt dl’Agenzia dles doganes che reverda na reorganisaziun interna y che istituî ma plü öna na direziun sora a Trënt y tolô insciö demez les döes direziuns provinziales, öna a Balsan y l’atra a Trënt. „Le provedimënt ê gnü contesté dala Junta provinziala por la violaziun dl Statut d’autonomia y dles normes d’atuaziun che reverda chësta materia“ á splighé incö, mertesc ai 12 de má le presidënt dla Provinzia Arno Kompatscher tratan la conferënza stampa do la sentada dla Junta. „Le tribunal aministratif da Balsan â azeté le recurs dla Junta provinziala y anulé de conseguënza i provedimënc dl’Agenzia“, insciö Kompatscher.
Ti pröms dis de má á le diretur dl’Agenzia impó renové n provedimënt che reverda les inciaries de coordinamënt, ince sce les sentënzes dl TAR â anulé sides le provedimënt che prevëiga la creaziun de na direziun unica co la bandida dl concurs por le suranstant. „La Junta provinziala á insciö tut la dezijiun da contesté chësc provedimënt nü che ne respetëia nia les competënzes autonomes reconesciüdes dal Statut d’autonomia“ á sotligné le presidënt Kompatscher.
rc
