La jonëza tl zënter dl Dé internazional di Museums
Mostres, vijites, rapresentaziuns teatrales y artejanales, jüc da stomé, musiga, festes de families, workshops, discusciuns sön l’ert, cianté deboriada y tröpes d’atres scomenciadies: chësc é le program dër rich por mituns, jogn y families en gaujiun dl Dé internazional di Museums en domënia, ai 17 de má dl 2015. L’entrada é debann te düc i museums che fej para.
Le Dé internazional di Museums dl 2015 ai 17 de má fej pert tl Südtirol dl ann tematich „Young & Museum“, n proiet metü adöm dala Repartiziun Museums y dal'Assoziaziun Museums Südtirol. Le fin dl proiet é chël da motivé i jogn da se dé jö de plü cun i museums y tl medemo momënt ince da sensibilisé i museums sön i interesc dla jonëza. Insciö vëgnel metü da jí en gaujiun dl 17 de má de plü scomenciadies ti museums, cun tröpes scomenciadies ponsades dantadöt por les jones y i jogn.
Chësc ann é le moto dl dé „Museum. Dagní. Sozieté“ cun le focus sön le tëmp passé, mo che trata ince domandes atuales y che se dá jö ince cun le dagní. „Le Dé internazional di Museums é na buna ocajiun por vijité i museums dl Südtirol che fej pert ala scomenciadia cun programs aposta y i sperun che al sides n suzés y che tröc anüzes chësta bela ocajiun“, insciö l’assessur por i museums Florian Mussner. Ince la direturia dla Repartiziun Museums Karin Dalla Torre é „dër contënta che tröc museums fej para cun n program ampl y na seria de scomenciadies interessantes por jogn, mo ince por les families y adulc.“
Le Museum Gherdëina de Urtijëi (via Rezia 83) mët da jí por le "Dé internazional di Museums“ ai 17 de má trëi scomenciadies dales 14 ales 18: la pröma á inom „Tl ruchsoch de Luis Trenker“, n aziun de jüch en gaujiun di 25 agn dala mort dl regist, atur y mënacrëp de Urtijëi Luis Trenker, la secunda scomenciadia é „Denant portâl l’inom de cutter“, na cërcia dl monn di films cun le produzënt Matthias Höglinger y le terzo proiet sará na scomenciadia dal titul „De pici grops“ cun jogn mënacrëp y alpinisć dla „Grupa Alpinisć Gherdëina“. A San Martin é le Museum Ladin Ćiastel de Tor davert dales 13.00 ales 18. I mituns po se devertí cun de vigni sort de jüc, se lascé depenje sö le müs y i.i. cun le grup Arteviva. Le Museum Ladin a San Ciascian deura bele dales 10 sües portes. Le clown Dolcinella ves aspeta cun sües matades dales 10.30 11.30, 14.45, 15.45, Domisdé él le paleontologh Herwig Prinoth che pîta vijites acompagnades dales 14.45 por talian y dales 15.45 por todësch. Le museum stlüj dales 18. L’entrada a entrami i museums é debann. N sorvisc de taxi debann mëna i vijitadus da S. Martin a San Ćiascian dales 14, 15, 16, 17, 18 y zoruch dales 14.30, 15.30, 16.30 y 17.30.
Aposta por mitans y mituns vëgnel metü da jí tröpes scomenciadies, sciöche por ejëmpl n workshop sön les netores tl Museum dla ciacia y dla pëscia de Ciastel Wolfsthurn, n jüch dediché a Maria Fassnauer, n’ëra dër gaierta y grana dl Tirol, che vëgn organisé dal Museum dles mineores de Ridnanu/Schneeberg. Implü vëgnel organisé danter l'ater na rapresentaziun teatrala dl roman „Die Leiden des jungen Werther“ dl scritur Johann Wolfgang Goethe che gnará mostrada tl Museums dles mascins da scrí de Partschins en colaboraziun cun les „Vereinigten Bühen Bozen“. N’atra scomenciadia é na fujina d’ert tl Museum dla cité de Bornech.
De plü informaziuns sön les scomenciadies organisades por le Dé internazional di Museums tl Südtirol pon ciafé tl codejel aposta (che é gnü injunté), y che é ince da ciafé ti Museums dla Provinzia, ti posć dles mostres y esposiziuns, tles aziëndes dl turism y tles biblioteches, sciöche ince sön internet, sot a: www.museen-suedtirol.it.
rc
