Gran suzes por la 32ejima festa dl sport por porsones cun handicap
Indöt 1300 porsones cun handicap á tut pert incö (12 de má) ala 32ejima ediziun dla festa dl sport y dla lidëza a Altenburg dlungia Kaltern. La scomenciadia é gnüda organisada dal Ofize Porsones cun handicap dla Provinzia en colaboraziun cun l’assoziaziun „Lebenshilfe“ y cun la scora profescionala por profesciuns soziales „Hannah Arendt“.
Na manifestaziun garatada cun tröc vijitadus é stada incö la 32ejima ediziun dla Festa dl sport y dla lidëza metüda da jí por porsones cun handicap tl zënter sportif Altenburg dlungia Kaltern: indöt 1300 porsones s’á incunté por passé n valgönes ores de aorela cörta deboriada. Le dé é gnü inaudé dales 09.30 cun les gares de atletica lisira, cina les 13.00 él gnü organisé de plü competiziuns sportives.
Ala festa dl sport ál indô tut pert chësc ann de plü studëntes y studënc cun handicap sciöche ince porsones che vir o laora tles strotöres soziales dles Comunitês comprensoriales, te strotöres privates tl Südtirol y tles regiuns vijines. Indöt á 45 strotöres soziales (scores, zëntri, assoziaziuns, yii.) partezipé al’organisaziun dla manifestaziun. Sciöche tles ediziuns da denant ne é gnanca chësc iade stada la competiziun sportiva al pröm post, mo le devertimënt da sté adöm por n per de ores de aorela cörta.
Tratan le dé s'á i partezipanc mosoré te plü competiziuns sportives, ti lascian ince lerch a jüc de creativité y de abilité. Do na marëna deboriada á l’assessuria por le sport y les politiches soziales Martha Stocker y l’assessuria por les families Waltraud Deeg, adöm al presidënt dla Comunité comprensoriala dl Überetsch-Unterland Edmund Lanziner, tigní la premiaziun. La manifestaziun é gnüda a se le dé por mirit dl Ofize Porsones cun handicap dla Provinzia che á colaboré cun l’assoziaziun „Lebenshilfe“ y la scora profescionala por laurs tl sozial „Hannah Arendt“.
rc
Galaria dales fotografies
