560 studënc al Dé dl'Europa a Toblach
Ai 12 de má á les trëi Intendënzes adöm al Zënter d’informaziun „Europe Direct Südtirol“ organisé le Dé dl’Europa tl zënter cultural Grand Hotel de Toblach. Plü co 500 maestri y studënc á tut pert ala manifestaziun.
L’Europa festejëia ai 9 de má la fondaziun dl’Uniun Europeica. Les trëi Intendënzes y le Zënter d’informaziun „Europe Direct Südtirol“ dla Provinzia á organisé por chësta ocajiun le Dé dl’Europa cun l’obietif da fá conësce ai partezipanc i conzec prinzipai y i programs dl’Uniun Europeica. La manifestaziun é gnüda organisada inier, ai 12 de má, tl Zënter cultural Grand Hotel Toblach.
Le cor dla Direziun scolastica taliana da Bornech á inauguré la manifestaziun adöm ai trëi suranstanc dles Intendënzes ladina, todëscia y taliana. Tratan le danmisdé ti él gnü presenté ai studënc danter l'ater la storia dl’Uniun europeica. Implü él gnü partí fora informaziuns sön les oportunités de formaziun sciöche l’Erasmus y l’e-Twinning. Plü co 500 studënc y maestri á tut pert ala manifestaziun de formaziun.
Tratan le domisdé él gnü porté dant plü avisa le funzionamënt dla realisaziun de proiec europeics sciöche Interreg, FESR, FSE, cun indöt 60 partezipanc che á orü se informé sön chëstes formes de sostëgn europeiches. De plü esperc dla Repartiziun Europa dla Provinzia y dl Ofize Integraziun europeica á partí fora informaziuns ütles sön i finanziamënc tres fonds europeics por la perioda 2014-2020.rc
Galaria dales fotografies
