Pasca de Ma: Jorantins „No Credit“ por i motoziclisć sön le Ju de Frara
Cun la campagna de sensibilisaziun „No Credit“ ó le Departimënt por la Mobilité aumenté la segurëza sön strada. Tratan le fin dl’edema de Pasca de Ma gnarál partí fora jorantins cun consëis sön le rovëne sigü sön strada. Implü fajará ince la polizia comunala de plü controi sön dötes les strades dl Südtirol.
Informaziuns d’ütl y consëis sön la segurëza é le contignü di jorantins „No Credit“ che gnará partis fora ai motoziclisć tratan le proscim fin dl’edema de Pasca de Ma sön le Ju de Frara. Ince la polizia comunala fajará de plü controi di motoziclisć sön dötes les strades dl Südtirol. Le compit prinzipal de chëstes aziuns dess ester la sensibilisaziun y informaziun di motoziclisć, mo sce al vëgn costaté n comportamënt nia coret, ince l’esecuziun de multes.
„Cun les aziuns de sensibilisaziun tl contest de No Credit orunse ti recordé a düc i autisć la responsabilité sön strada, nia ma ti confrunc de se instësc, mo ince ti confrunc di atri“, á splighé l’assessur por la mobilité y le sorvisc strades Florian Mussner. Aziuns de control preventives y d’informaziun é n pilaster important dla campagna de sensibilisaziun „No Credit“, che á l’obietif da smendrí i inzidënc sön les strades dl Südtirol. Dlungia le simbol grafich nü, che é da odëi sön les corieres, sön i placac dlungia strada, pro les architades dles corieres y sön i jorantins á la campagna ciamó trëi d’atri pilastri fondamentai. Por aumenté la segurëza di motoziclisć él insciö preodü, sciöche ince ti agn passá, n’ajornamënt costant dla segnaletica y dl’ilumiaziun dles strades, n ressanamënt de strades cun l’asfalt danejé y l’istalaziun de tlandri dla strada nüs cun na proteziun aposta por i motoziclisć sön 63 trates dër prigoroses. Inant jará ince la colaboraziun cun le Safety Park, olache al é gnü realisé n flyer cun informaziuns ütles y cun chël che i motoziclisć ciafará ince na diminuziun di cosć por cursc de segurëza y d’ajornamënt al Safety Park.
rc
