Presentaziun dl liber „Recordanzes de n maester“ de Franz Vittur ai 05/06
Recordanzes dër prezioses che descrii le svilup dla scora ladina y i recorc personai é gnüdes racoiüdes dal maester Franz Vittur, intendënt dla scora ladina dal 1975 cina al 1992, te na publicaziun nöia che gnará presentada ai 05 de jügn dales 18 tla biblioteca Sas dla Crusc a Badia.
La scora ladina da incö ne podesson nia plü se ponsé demez dala realté culturala y soziala dla Val Badia y de Gherdëna. Amirada da n gröm d’atres comunités éra öna dles istituziuns plü importantes por le mantignimënt y le svilup dl lingaz y dla mentalité ladina. Mo can éra pa nasciüda? Y ciünes é pa stades les porsones che ti á dé forma?
Te na picia publicaziun de incër 100 plates cunta Franz Vittur de süa vita, de sciöche al á frecuenté la scora taliana sot al fascism, denant che rové a Porsenú tl Vinzentinum por fá na scora porí todëscia. Impormó do che la secunda vera dl monn ê stada rovada ân metü man de se fá pinsiers sön le sistem scolastich che an s’ess dejidré tla Val Badia y te Gherdëna. Dên jí cun la scora todëscia, sciöche an la conesciô dan le passaje ala Talia o dên se salvé le sistem talian, sciöche al ê te döt le stat? Chëstes domandes é gnüdes analisades a funz tla publicaziun nöia, te chëra che l’intendënt da denant Franz Vittur descrii les sfidades dla scora ladina cun le passé dl tëmp. La publicaziun nöia á insciö ince na valüta storica y leterara por düc i leturs interessá al svilup dla scora paritetica tles valades ladines dl Südtirol.
La publicaziun nöia sön la vita y i recorc de Franz Vittur, de sciöche al á metü man d’insigné, de sciöche al é deventé diretur, intendënt y ispetur, gnará presentada
en vëndres, 05.06.2015,
dales 18.00
tla biblioteca Sas dla Crusc
tla ciasa Vijo Vittur
a Pedraces/Badia
en presënza dl assessur ladin Florian Mussner, dl intendënt da sëgn Roland Verra y dl diretur dl Ciamp Inovaziun y Consulënza Felix Ploner. Dla cornisc musicala dla festa se fistidiará le Cor di Ëi da San Linert.
Dötes y düc é de cör inviá a tó pert ala manifestaziun. La publicaziun y la manifestaziun vëgn portades dal Ciamp Inovazion y Consulënza dl Dipartimënt Educaziun y Cultura Ladina adöm cun la Cassa Raiffeisen Val Badia. Plü informaziuns sön pedagogich.it
rc
