S.O.S. Zebra: Sigurté sön strada y mobilité sostenibla tles scores
Strades da jí a scora sigüdes, sigurté tl trafich cuotidian y na maiú sensibilité sön tematiches dla mobilité sostenibla – chisc é stá i obietifs prinzipai dles aziuns de sensibilisaziun da inann de „S.O.S Zebra!“. Ma cun les aziuns organisades dales Repartiziuns Mobilité y Sorvisc Strades, adöm cun l’Ökoistitut y la Polizia comunala él gnü arjunt 1.000 scolars y geniturs.
Sconé i peduns sciöche pert plü debla dl trafich stradal y ti dé ai scolars y ales scolares informaziuns ütles y pratiches sön la sigurté sön strada y sön la mobilité sostenibla: cun la campagna de sensibilisaziun nöia da inann de „S.O.S. Zebra“ á les Repartiziuns Mobilité y Sorvisc Strades renforzé la colaboraziun cun l’Ökoistitut y la Polizia Comunala por tematisé dantadöt la sigurté sön le percurs da jí a scora y les formes desvalies de mobilité sostenibla. Söl program da inann êl da ciafé insciö tröpes eserzitaziuns pratiches adöm ai scolars y ales scolares, sciöche por ejëmpl fujines por reparatöres de rodes, escursciuns tles vijinanzes dles scores por descurí i prighi sön strada, trainings por n comportamënt sigü sön strada y le geocaching. „Düc chisc proiec é de gran importanza, deache i scolars y les scolares impara insciö les regoles fondamentales dla sigurté sön strada y podará se möi cun plü autonomia y sigurté sön strada, da reconësce i prighi abonora y de conseguënza da reagí dërt“, dij l’assessur por la mobilité Florian Mussner. N ater obietif dla campagna é ince chël da pratiché la mobilité sostenibla tles scores por porté i scolars y i jogn, mo ince sü geniturs y le personal didatich da adoré deplü i mesi dl trasport sostenibl, sciöche la roda y le trasport publich, insciö l’assessur Mussner che rengraziëia ince la polizia comunala por la buna colaboraziun.
Tut pert ales scomenciadies metüdes da jí tles scores y scolines dales Repartiziuns Mobilité y Sorvisc Strades adöm cun l’Ökoistitut, le Safety Park y les rapresentanzes locales dla Polizia comunala á indöt söi 1000 scolars y scolares adöm cun i geniturs. Implü él ciamó da cumpedé lapró les scomenciadies organisades extra dala polizia comunala. Tres n’inrescida dl Ökoistitut á les scomenciadies tles scores elementares y mesanes funzioné dër bun. Les scores se damana insciö tl dagní na continuaziun dla campagna che vëgn bele planificada.
N’ater pilaster important dla campagna SOS Zebra é la costruziun de barieres architetoniches por aumenté la sigurté dlungia y sön les strisciores pedonales. Insciö él gnü monitoré y registré ti ultims dui agn, 2014-2015, dötes les strisciores pedonales por les valuté aladô di critérs dla visibilité, velozité, segnaletica y ilominaziun. „Les strisciores pedonales plü prigoroses é bele gnüdes metüdes en segurëza, por la realisaziun de nöies él gnü aprové regoles plü prezises“, recorda l’assessur por la mobilité. Insciö mëss les striscores gní ilominades bun (ince les zones de speta di peduns) y pó ma gní costruides olache düc chi che rovënn y passa la strada á na buna suraodüda sön la strada. Implü á les Repartiziuns Mobilité y Sorvisc Strades dé fora na brosciüra d’informaziun cun les regoles de comportamënt plü importantes sön y dlungia les strisciores pedonales. La brosciüra pó gní desciariada por ladin, todësch y talian sot a www.provinz.bz.it/strassendienst/ y www.provinz.bz.it/mobilitaet/.
Por aumenté l’influs dles mosöres de sensibilisaziun y de metüda en sigurté, insciö l’assessur Mussner, él damané l’aiüt de vigni porsona che se möi sön strada „da se tigní tres ales regoles dl codesc dla strada, da adaté la velozité ala situaziun locala y dl tëmp y da sconé te na manira particolara la sigurté di peduns.“
rc
Galaria dales fotografies
