Kompatscher rengraziëia l’ex presidënt dl EURAC Stuflesser
Do da 23 agn a cé dl’EURAC dará Werner Stuflesser tosc jö süa inciaria sciöche presidënt dl’Academia Europeica da Balsan. Incö (19 de jügn) s’á Stuflesser incunté cun le presidënt Kompatscher che á orü le rengrazié personalmënter por „avëi contribuí dër tröp al svilup dl’inrescida te nosta Provinzia.“
„Inrescida y inovaziun – spliga le presidënt Kompatscher – é i dui pilastri de n sistem economich y sozial orienté tl vers dl dagní, ai é la tlé por le mantignimënt dla competitivité de n pice raiun sciöche le nost. Por chësc motif é sté le gran impëgn de Stuflesser da 23 agn a cé dl’Eurac n contribut sostanzial por l’inrescida te Südtirol." Dal 2007 é Stuflesser ince sté a cé dla consulta provinziala por l’inrescida y l’inovaziun, n atra funziun olache al á contribuí te na manira sostanziala al svilup dl'inovaziun tl Südtirol, insciö Kompatscher.
Do i stüdi de matematica á Werner Stuflesser da Urtijëi, che á atualmënter 66 agn, metü so adöm cun atri l'Istitut provinzial de statistica ASTAT, che al á ince manajé sciöche diretur. Dala fondaziun dl EURAC é Stuflesser sté por 23 agn a cé dl’Academia Europea da Balsan, che al á daidé da amplié a öna dles strotöres d’inrescida prinzipales dl Südtirol. Atualmënter laora tl EURAC indöt 400 colaboradus y colaboradësses, cun 11 istituc d’inrescida che é atifs sön 4 seturs desfarënc (autonomia, munts, sanité y tecnologies). Werner Stuflesser é ince sté mëmber de tröpes istituziuns d’inrescida y co-fondadú dl’Université da Balsan. Dlungia so lingaz dla uma, le ladin, rajona l’oramai ex-presidënt dl Eurac ince todësch, talian y inglesc.
rc
