De mondial di migranc ai 20 de jügn: „Porsones sciöche vignun de nos“
L’emergënza y les soferënzes de indöt prësc 60 miliuns de porsones che é tl sun sciampé da violënzes y maltratamënc é tl zënter dl De mondial di migranc ai 20 de jügn. Por l’assessuria Stocker é la chestiun di migranc na sfidada de dimenjiuns globales. „Impó ne dess l’Südtirol nia stlü i edli“,dij Stocker che damanda do comprenjiun y desponibilité da daidé i migranc y les porsones che damana asil.
„Les porsones migrantes pëia tres ia cun na gran malsigurté, ares fej sovënz n tru dër prigorus te de gragn dificoltés, cun l’obietif da podëi mët man na vita nöia te n raiun sigü“ – chësc é le pinsier dl’assessuria por les politiches soziales Martha Stocker en gaujiun dl De internazional di migranc ai 20 de jügn. „Tröpes porsones mët en prigo süa vita canche ai é söl iade cun les barches por arjunje l’Europa dal Mediteran, mo la ghiranza do na vita en pesc y cun n’esistënza sigüda é na motivaziun tan grana da lascé zoruch süa familia y da riscé süa vita“, recorda l’assessuria Stocker. Porchël él dër important - secundo l'assessuria por les politiches soziales - da monitoré tres de plü chësta problematica che pó ma gní stlarida tres na colaboraziun de düc i interessá a livel internazional.
Le Dé mondial di migranc ai 20 de jügn vëgn metü da jí sot le moto „migranc – porsones sciöche iö y tö“. Tl raport publiché da püch dales Naziuns Unides él gnü segnalé che la chersciüda de migranc dal ann 2013 al 2014 é stada la plü grana registrada cina sëgn. „Ince sce chëstes é ma zifres, ne podunse mai se desmuntié che do vigni imaja che an vëiga sön i mass media se ascognél porsones singules cun na storia y na vita, che é obliades da lascé süa patria por guajies de violënzes, fan y vera. Al se trata de peri, de umes, de mituns, de jënt atempada – porsones sciöche iö y tö – che á ma la ghiranza da avëi na vita en pesc y sigurté“, insciö l’assessuria.
„Naturlamënter dess l’obietif prinzipal dla comunité internazionala ester chël da ciafé na soluziun ala problematica diretamënter ti paisc söl post, mo baldi é chësc por gaujia dles situaziuns caotiches sovënz dër ri", insciö Stocker. „Chësc ne dess porchël nia ester na guajia por ne ti daidé nia ai migranc che röia te nosta Provinzia y dai acompagné por n tóch dl tru. Deache öna na cossa nes coliëia düc inanter nos, l’umanité“, stlüj jö l’assessuria che ti dij dilan a düc i volontars che dëida para de por de da ti dé ai migranc n pü de speranza y sostëgn.
rc
