Le presidënt de FederCulturaTurismoSport s’incunta cun l’assessuria Stocker
Cultura, turism, y sport é i trëi pilastri zentrai dla federaziun locala nöia „FederCultura Turismo Sport Alto Adige Südtirol“, che é gnüda fondada da püch dala federaziun dles cooperatives Confcooperative. Le presidënt Massimo Moretti ti á presenté da püch al’assessuria por l’sport Martha Stocker i fins dla federaziun locala nöia, sües ativités y intenziuns.
1475 cooperatives cun 318.620 mëmbri y plü de 14.000 colaboradus despartis sö sön döt le teritore dla Talia fej pert dla federaziun dles cooperatives "FederCultura, sport e turismo". Ala fin dl mëis d’aurí á la federaziun nazionala fondé n rapresentant local, la „FederCultura Turismo Sport Alto Adige Südtirol“. Tratan la pröma incuntada cun l’assessuria por le sport Martha Stocker ti á le presidënt Moretti presenté les ativités prinzipales dla federaziun nöia, i obietifs y les intenziuns prinzipales. Al é ince gnü rajoné de oportunités poscibles de colaboraziun. „La rapresentaziun locala nöia nes pita na paladina nöia por n barat d’informaziuns plü monü sön les sfidades che podará gní tratades deboriada y sön les situaziuns spezifiches ti seturs dl sport, dl turism y dla cultura“, á sotligné l’assessuria por le sport tratan l’incuntada.
I obietifs dla federaziun de cooperatives „FederCultura Turismo Sport“ reverda, danter l’ater, n barat d’informaziuns costant cun les assoziaziuns y organisaziuns locales, regionales, nazionales y internazionales, le sostëgn dles cooperaziuns che é atives ti seturs dl sport, dl turism y dla cultura (dantadöt por ci che reverda chestiuns iuridiches, tecniches, d’organisaziun y de finanziamënt), la promoziun dla formaziun, la colaboraziun cun d’atres organisaziuns dla Confcooperative y la costruziun de na rëi de sostëgn y colaboraziun.
rc
