L’assessuria Stocker s’á incunté cun na delegaziun dla Lia di Artejans
L’assessuria por le laur Martha Stocker s’á incunté da püch cun na delegaziun dla Lia di Artejans (LVH-APA) dl Südtirol. Tl zënter dl’incuntada él sté les tematiches di apalc, dla surandada di laurs publics a imprejes dl post y dl inserimënt de cursc aposta sön la sigurté söl laur tles scores profescionales.
La surandada di laurs publics a imprejes dl post é sté un di temesc zentrai dl’incuntada tignida da püch danter l’assessuria por le laur Martha Stocker cun na delegaziun dla Lia di Artejans (LVH – APA) dl Südtirol. L’assessuria á confermé la orenté y so impëgn da garantí les condiziuns por che i apalc tl setur publich pois gní assegná a imprejes locales. Por ci che reverda la sigurté söl laur á la delegaziun dla Lia di Artejans damané al’assessuria da inserí ti programs dles scores profescionales, tres l’acordanza sön le lernerat, cursc aposta che reverda la sigurté söl post de laur por i lerneri dles scores profescionales ti seturs cun profesciuns spezifiches.
Cun l’acordanza sön le lernerat gnarál smendrí dal ann de scora 2015/16 te cater direziuns spezifiches dles scores profescionales n’ora d’insegnamënt tles cuintes classes: i lerneri dess insciö adoré chësc tëmp por partezipé debann ai cursc de sigurté nezesciars che vëgn pitá tres le programm de formaziun dles scores profescionales. N’obietif de dorada lungia resta por la Lia di Artejans l’inserimënt de cursc aposta por la sigurté tles ores de leziun dles scores profescionales. „Adöm cun la Repartiziun Laur fajarán sëgn n'analisa de chësta ghiranza por odëi sce al é poscibl da fá avarëi l’insegnamënt sön la sigurté tles scores profescionales sciöche cursc zertificá“, á confermé l’assessuria Stocker ala Lia di Artejans.
rc
