Cooperaziun al svilup, Kompatscher á incunté na delegaziun dal Ecuador
Le presidënt Arno Kompatscher s’á incunté incö (ai 22 de jügn) cun na delegaziun dal Ecuador, n paisc dl’America dl Süd olache la Provinzia sotëgn de plü proiec de cooperaziun al svilup por mioré l’efiziënza dl’aministraziun publica. I programs de sostëgn döra ciamó cina le 2017, mo an pënsa a n arlungiamënt.
„La Provinzia de Balsan – á sotligné le presidënt Kompatscher – sostëgn cun tröc programs de cooperaziun al svilup de plü regiuns dl monn, mo chël che reverda la Mancomunidad del Norte tl Ecuador é dër spezial“. Le proiet reverda insciö na seria de scomenciadies che renforzëia le funzionamënt dl’aministraziun publica locala, acioche ara devëntes plü efiziënta y por aumenté la partezipaziun popolara al’intern di prozesc de dezijiun. N ater obietif dl proiet de sostëgn é chël da cherié na banca dac por aumenté les conescënzes sön i dac geo y sön la situaziun demografica y soziala dla popolaziun.
„Por ci che reverda la partezipaziun popolara únse ince nos chiló tl Südtirol ciamó da mioré, mo i ún na seria de conescënzes che pó bele atualmënter ester d’ütl por d'atri paisc“, insciö le presidënt Kompatscher. Al’incuntada ál tut pert le prefet dla provinzia de Carchi, Guillermo Herrera, i responsabls dla cooperaziun al svilup dla Provinzia, sciöche ince na seria de funzionars dles cater Provinzies dl Ecuador dl Nord che fej pert dl program. „La colaboraziun é gnüda a s’l dé tl 2014 y le proiet ess messü doré cina le 2017, mo i sun bele tl planifiché n arlungiamënt, tolon ite ince n valgönes zones dla Colombia meridionala.“
rc
Galaria dales fotografies
Foto USP/ohn
