Dala Junta: le pat por le lernerat é gnü aprové
La Junta provinziala á aprové incö (23/06) le pat por le lernerat che prevëiga mosöres de sostëgn por le lernerat tradizional y n aumënt di posć a desposiziun por i lerneri. Le pat gnará sotescrit y presenté plü avisa en jöbia ai 25 de jügn dal assessur Philipp Achammer y dales organisaziuns soziales.
Cun la combinaziun danter formaziun scolastica y laur pratich tles imprejes é le sistem de formaziun dual dl Südtirol n model de suzés che vëgn reconesciü ince a livel nazional, cun na seria de vantaji nia ma por i jogn, mo ince por les imprejes y por l’ocupaziun en general. Chësta poscibilité ajuntiva de formaziun vëgn ince odüda sciöche na forma che funzionëia bun cuntra la dejocupaziun jonila te Südtirol. “Sëgn ne ó la Junta nia ma confermé i posć a desposiziun, mo l’obietif é chël da amplié le numer de posć por i lerneri”, á anunzié le presidënt dla Provinzia Arno Kompatscher incö ai 23 de jügn do la sentada dla Junta che á aprové le “Pat por le lernerat”.
Le pat por renforzé le lernerat tradizional é gnü a s’l dé do n confrunt cun les organisaziuns soziales y contëgn mosöres concretes por mioré les condiziuns y les modalités dl sistem de formaziun a bëgn dla jonëza. L’acordanza gnará sotescrita y presentada plü avisa en jöbia ai 25 de jügn tl Palaz provinzial 1 dal assessur Achammer adöm cun i rapresentanc dles imprejes y di sindacac.
rc
