Dala Junta: sön la banda leria gnarál sconé l'interes publich
La Junta provinziala á tut incö (23 de jügn) la dezijiun al’unanimité da sconé l’interes publich jon cuntra la delibera anunziada dala Brennercom SpA da paié fora la partezipaziun dla Provinzia al’intern dla sozieté. „I ne podun nia azeté l’espropriaziun de n bëgn publich da pert de privac“, á sotligné le presidënt dla Provinzia Arno Kompatscher.
Do la sentada edemala dla Junta á le presidënt dla Provinzia Arno Kompatscher stlarí incö ai 23 de jügn che al é tl interes dla popolaziun che l’infrastrotöra dla banda leria restes n bëgn publich. La banda leria é n setur de interes strategich y istituzional sciöche por ejëmpl ince la rëi dles strades publiches. „Al ne é nia imaginabl che na strotöra tan fondamentala por l’anuzadú pois rové te mans privates“, á sotligné le presidënt Kompatscher, recordan che la Provinzia â bele aprové dan da tëmp le plan de venüda de partezipaziuns de imprejes nia strategiches, „y danter chëstes ne él nia la Brennercom“.
Tratan la sentada da incö s’á la Junta provinziala dé jö dër avisa cun la chestiun y á concordé da sconé l’interes publich le plü che ara va y cun la mascima priorité. Al é insciö gnü tut la dezijiun al’unanimité da fá recurs cuntra la mosöra tuta dal Consëi d’aministraziun dla Brennercom ai 19 de jügn. Por rapresenté i interesc dla Provinzia te chësta chestiun él gnü nominé l’avocat Marcello Clarich, professur de dërt aministratif dla LUISS de Roma y l’Avocatöra dla Provinizia. Implü ti á la Junta dé l’autorisaziun al Presidënt dla Provinzia da firmé n’acordanza de sindacat cun les atres sozietés publiches che á cuotes de partezipaziun dla Brennercom (la Selfin Srl, l’Autobrennero Spa y l’ASM Bressanone Spa) cun l’obietif da tó les dezijiuns che reverda le svilup dla Brennercom tl dagní te na forma unitara y da concordé düc adöm mosöres eventuales de venüda o de cumpra dles aziuns dla sozieté Brennercom.
La Provinzia á atualmënter na cuota de partezipaziun de 42,354 porcënt dla Brennercom. Ai 19 de jügn á le presidënt dl Consëi d’aministraziun dla Brennercom comuniché ala Provinzia cun n email che tla sentada de ai 19 de jügn á le CdA costaté la tomada dla partezipaziun dla Provinzia tla Spa, possessuria de 19.483 aziuns, y de avëi stabilí le valur dla cuota dla Provinzia de 764,27 euro por aziun, rovan a na soma totala de 14,89 miliuns de euro.
rc
