L’assessur Achammer y les organisaziuns soziales á firmé le pat dl lernerat
La formaziun duala te Südtirol é reconesciü sciöche n model de suzes, che dess gní renforzé: por porté inant chësc fin él gnü sotescrit incö (25/06) sön proposta dl assessur Philipp Achammer adöm cun dötes les organisaziuns soziales y ’aministraziun publica n pat por le lernerat. Le documënt é gnü a se le dé tres na colaboraziun strënta ti ultims mëisc.
La formaziun duala é n model de suzes por amplié les poscibilités de formaziun por i jogn, sciöche ince n’ocajiun por l’economia dl Südtirol: le lernerat ti pita ai studënc y ai jogn n coliamënt dër particolar danter formaziun y laur. Por l’economia é i lerneri importanc che ti garantësc ales imprejes lauranc esperc ti seturs desvalis.
I fins prinzipai di proscims trëi agn cina le 2018 é da mantigní le numer di lerneri dl 2014 y da porvé da amplié de le numer de iscric sce poscibl dl cin' porcënt, sciöche ince da mioré la cualité dl’oferta didatica. L’assessur por l’istruziun Philipp Achammer y i rapresentanc dles organisaziuns soziales á firmé incö, jöbia ai 25 de jügn, tl contest de na conferënza stampa l’acordanza arjunta.
„La formaziun duala é n model de suzes cun na tradiziun lungia, che vëgn amiré da plü perts dla Talia“, insciö l’assessur Achammer che á sotligné inant, „che le pat é gnü a se le dé tres la colaboraziun cun i responsabls dles organisaziuns di daturs de laur, di cater sindacac y di ofizi competënc dla Provinzia.“ Por Philipp Moser dl „Südtiroler Wirtschaftsring“ é le pat, danter l’ater, n renforzamënt dl aspet pratich tl lernerat. N bun segnal de start é por Tila Mair, rapresentanta di sindacac, che dötes les organisaziuns soziales á lauré adöm ala proposta dl pat.
I partners á definí insciö de plü mosöres concretes: da öna na pert dessel gní metü da jí de plü workshops y practicums por ti alisiré ai jogn l’ingres tl monn dl laur. N secundo punt reverda l’alisiramënt di daturs de laur y le reconoscimënt de so laur de formaziun di lerneri. Insciö dess les imprejes che laora cun lerneri ciafé na zertificaziun aposta por aumenté la visibilité dles imprejes. N ater vare é l’integraziun di cursc prinzipai sön la segurëza söl laur tl curriculum academich dles scores profescionales. Implü dessel gní ince mostré sö i vantaji dl lernerat, cun premiaziuns di lerneri plü lezitënc y dles imprejes cun les ofertes plü interessantes por i lerneri. Le renforzamënt dl ejam de maduranza tles scores profescionales é ince n punt sön le program di proscims agn. Tres na colaboraziun plü strënta danter la scora y l’economia dessel ince gní otimisé la cualité dl’oferta didatica.
rc
Galaria dales fotografies
