Assistënza da d’instà: 252 proiec per 57.000 mutons y jëuni
Na ufierta rica y de gran varietà ti vëniel pità ai mutons y ai jëuni da 3 a 15 ani ti mënsc da d’instà. L’assessëura provinziela Waltraud Deeg à prejentà ncuei (26 de juni) dut l program che tòl ite bën 252 proiec per 57.000 mutons y jëuni. Dal departimënt per la familia vëniel metù a despusizion per chësc program de ndut 4,7 milions d’euro
"L ie per nëus de mpurtanza sustenì l miec che la va la families ti mënsc da d’instà. Ma ulon nce cialé che i mutons y i jëuni giape na bona assistënza y che i posse se nuzé de na ufierta de scumenciadives rica" à dit ncuei (ai 26 de juni) l’assessëura provinziela Waltraud Deeg n ucajion dla prejentazion dl program de chëst ann. "Piton proiec, pra chëi che mutons y jëuni de rujeneda y pruvenienza defrënta posse sté adum y passé n bel tëmp deberieda a na moda che nce mutons y la mutans cun handicap ebe si lerch" auza ora l’assessëura provinziela Deeg n cont dl cunzet d’assistënza da d’instà.
La ufierta ie propi scialdi rica y tòl ite proiec de sustëni dl muvimënt y dla rujenedes sciche ufiertes sportives y jites, berstotes criatives y enes d’aventura. L vën de ndut pità 252 proiec te 42 chemuns y 7 scoles da pert de 203 ënc privac. L vën cialà dut l dì sun ntëur n 50.000 mutons tl’età dai 3 ai 15 ani y mez l dì sun 7.500 mutons.
"Ti cunfronc dl ann passà àn auzà sibe la ufierta che nce la cumpëida dl personal pedagogich spezialisà che juda pea a dejëujer i proiec", à dit Stefan Walder, l diretëur dl Departimënt per la familia y l’aministrazion. Nsci ie per ejëmpl avanà l numer dla scolines da d’instà ti chemuns tl cunfront cun l 2014 da 34 a 46. Pervia dla gran dumanda da pert di genitores à l Departimënt per la familia auzà i mesuns finanziei per l’assistënza da d’instà. Per chëst ann iel a despusizion ntëur n 4,7 milions d’euro, chël ie 600.000 d’euro plu che tl 2014. "Ti ultimi cin ani ie avanei sibe la cumpëida di proiec che nce i cuntribuc" à detlarà l diretëur dl Departimënt per la familia y l’aministrazion.
Cuntribuc plu auc iel da garat per proiec de sustëni per la rujenedes y per l acumpaniamënt de mutons cun n bujën particuler de secudienza. "Nosc travert per l daunì ie chël de amplië la ufierta d’asssistënza tres na mëura coordinazion a livel local tres i chemuns a na moda che l posse unì curì pusciblmënter dut l d’instà" dij l’assessëura Deeg.
usp
