Expo: Kompatscher cun le presidënt austriach Fischer al stand dl Südtirol
En ocajiun dl de dediché al’Austria al Expo de Milan 2015, á le presidënt dla Provinzia Arno Kompatscher saludé incö ai 26 de jügn al stand dl Südtirol na delegaziun cun a cé le presidënt dla Republica austriaca Heinz Fischer, sotlignan la funziun de punt dl Südtirol danter le nord y le süd.
Le presidënt dla Provinzia Arno Kompatscher ti á dé le begnodü incö, vëndres ai 26 de jügn a na delegaziun ofiziala cun a cé le presidënt dla Republica dl’Austria Heinz Fischer al stand dl Südtirol al Expo 2015 a Milan. Dla delegaziun austriaca fajôl pert le vize-premier Reinhold Mitterlehner, i ministri Josef Ostermayer y Andrä Rupprechter y le presidënt dla Ciamena economica austriaca Christoph Leitl. „I sun n punt danter le nord y le süd y le De dl’Austria al Expo é na buna oportunité por sotrisse chësta funziun de coliamënt“, á dit Kompatscher. Tl dagní sarál tres plü important da renforzé chësc lian de colaboraziun danter i raiuns culturals y economics dl’Austria, dla Germania y dla Talia, insciö Kompatscher. Le presidënt á recordé che tosc piarál ince ia l’edema dl’Euregio al Expo de Milan, che vëgn manajada dal GECT tl stand dl Südtirol dai 10 ai 16 de jügn, „por presenté deboriada i seturs desvalis di trëi raiuns dl Euregio.“
Le presidënt Fischer á detlaré che al stand dl Südtirol se sintún a ciasa y á laldé la composiziun artistica dl stand che se adatëia bun al contest. Dedô á Kompatscher tut pert ala manifestaziun ofiziala por la delegaziun austriaca tl Palaz dla Talia y al é ince gnü invié al Forum dl’Austria tl zënter de Milan.
rc
Galaria dales fotografies
