Bausparen: I pröms contrac é sotescric
Le model südtirolej dl Bausparen é da püch realté: da sëgn inant pó düc i zitadins che é scric ite te n fonds dla ponsiun damané do mosöres de sostëgn y de imprëst cun fic a de bunes condiziuns dl 1,5 porcënt. Incö (29 de jügn) él gnü sotescrit i pröms contrac a Balsan en presënza dl presidënt dla Provinzia Arno Kompatscher y dl assessur por le frabiché Christian Tommasini.
La forma nöia dl Bausparen é ponsada dantadöt por i jogn y les jones dl Südtirol y por chi che ne pó nia se pormët la cumpra de n abitaziun nöia y che á n davagn massa alt por podëi s’anuzé dles atres mosöres de sostëgn dla Provinzia. Fá domanda pó düc chi che á sot ai 55 agn, che é scric ite da almanco 8 agn a n fonds dla ponsiun (cun almanco 15.000 euro paiá ite) y che á süa residënza da almanco ot agn te Südtirol.
La Provinzia mët bele a desposiziun di zitadins de plü mosöres de sostëgn por la cumpra, la costruziun y le ressanamënt dla ciasa, por ejëmpl tres le frabiché convenzioné y le frabiché alisiré, á recordé le presidënt dla Provinzia Arno Kompatscher tratan la presentaziun dl program dl Bausparen incö (ai 29 de jügn) tla curt interna dl Palaz provinzial 1. „Cun la politica dl frabiché dëida la Provinzia da de plü dezenns i abitanc dl Südtirol pro la costruziun o la cumpra de na ciasa de proprieté privata. Tresc chësc sistem pól gní aumenté la cualité dla vita y dla segurëza economica y tl medemo tëmp vëgnel ince sostigní l’economia locala“, á recordé le presidënt dla Provinzia. N ater vantaje dl program, tres la colaboraziun cun les banches, é le smendrimënt dla burocrazia por fá domandes, insciö Kompatscher. La Junta provinziala á bele preodü n investimënt de 20 miliuns de euro por le start dl model nü.
L’assessur por le frabiché Christian Tommasini á sotligné che le program se basëia sön les mudaziuns tles strotöres dles families: „Al é preodü che les proscimes generaziuns ne podará nia plü damané tan sovënz do l’aiüt di geniturs por la cumpra o costruziun de abitaziuns nöies y tres chësc program dessél gní sovenzioné dantadöt la jonëza“, insciö Tommasini. Informaziuns plü monüdes pó gní damanades pro les portines dles banches, al é poscibl da s’anuzé dl model sides por la cumpra de na pröma ciasa, co por le ressanamënt de na ciasa y por la costruziun de n frabicat nü.
N gran vantaje dl program é le fit a dër de buns condiziuns, á splighe Reiner Steger, mëmber dl consëi d’aministraziun de Pensplan. „Le model dl Bausparen garantësc n fit de 1,5 porcënt por döta la dorada dl credit.“ Johannes Schneebacher, le diretur general dla „Südtiroler Volksbank“ á sotligné tratan la presentaziun che „le Bausparen é na scomenciadia che ne fossún nia stá bugn da realisé zënza le contribut dla man publica.“ Le diretur general dla Cassa dl Sparagn Nicola Calabró á ince laldé la scomenciadia, dantadöt por les bunes condiziuns di fic.
Do l’isté gnarál ince metü da jí de plü manifestaziuns de presentaziun dles poscibilités d’atuaziun dl Bausparen, por ejëmpl tratan l’edema dl bausparen danter ai 12 cina ai 18 d’otober, sciöche ince al'intern dla fiera dl frabiché dai 17 ai 18 de otober y tratna la fiera da d’altonn dai 19 ai 22 d’otober.
Intervista presidënt Kompatscher:
http://we.tl/C50Lr94bzo
Intervista assessur Tommasini:
http://we.tl/L7a5G17ya4
Intervistes presidënt dla Provinzai Kompatscher y assessur Tommasini MP3 (audio):
http://we.tl/muUYFs9yMf
rc
Galaria dales fotografies
USP / ohn
