„La geologia dles Dolomites“, escurjiuns cun le Museum Ladin
Impröma na spligaziun dl svilup geologich dles Dolomites da pert de n espert de paleontologia dl Museum, daldô n’escurjiun geologica cun n acompagnadú tl Parch natural Pöz-Odles: chësta oferta gnará pitada dal Museum Ladin Ciastel de Tor vigni mertesc dai 30 de jügn inant cina al 1 de setëmber dl 2015.
Tl ann 2009 é perts dles Dolomites gnüdes proclamades dal UNESCO bëgn natural dl’umanité, deache ares ti pita ai vijitadus y ala popolaziun locala na paladina naturala de morvëia y de gran belëza, te chëra che al é ince poscibl da inrescí la storia naturala y geologica y da se dé jö cun le lian danter la natöra y l’ert.
La geologia dles Dolomites sará chësc ann ince tl zënter de plü escurjiuns che gnará metüdes da jí dal Museum Ladin Ciastel de Tor a San Martin da indoman, mertesc ai 30 de jügn vigni dedolönesc cina al 1 de setëmber dl 2015. La jornada metará man le danmisde tl Museum dales 9 ales 10 cun na spligaziun por todësch dl svilup geologich dles Dolomites da pert de n paleontologh, dales 10 ales 11 gnarál spó tigní le referat por talian. Tres chësc referat sarál poscibl da imparé da conësce i corëc y les peres tipiches dles Dolomites.
Tratan le domisde gnarál organisé n’escurjiun geologica tl Parch natural Pöz-Odles. Sön n tru geologich a pe dl Sas de Pütia gnarál splighé les informaziuns plü interessantes sön la formaziun di corëc y dles peres tles Dolomites. Al sará ince poscibl da amiré les creaziuns artistiches dl proiet SMACH (San Marin Art Culture and History). Chësc proiet é gnü a se le dé por le secundo iade y coliëia l’ert cun le paesaje y la storia dl comun da San Martin. Les escurjiuns metará man vigni mertesc dales 14.30 sön la plaza da parchené de Börz y se rovará dlaes 17.30.
Le prisc por tó pert a entames les scomenciadies sará de set euro. Por les iscriziuns prëibel contaté le Museum Ladin sot le numer dl telefon 0474 524020 o ince ti ofizi dl turism dla Val Badia. Les escurjiuns vëgn metüdes da jí en colaboraziun cun l’Ofize Parcs naturai dla Provinzia.
rc
Galaria dales fotografies
