Vari inant de concretisaziun dl’acordanza culturala di raiuns dl'Euregio
Concretisé y aumenté les poscibilités de colaboraziun culturales danter les provinzies dl’Euregio: i assessurs por la cultura dl Tirol, Südtirol y Trentin s’á incunté incö domisdé ai 29 de jügn a Desproch por traté les oportunités da lauré adöm tl setur cultural. Tres de plü sará les scomenciadies metüdes da jí y planificades adöm dai trëi raiuns.
La De di museums dl Tirol storich, le concurs de musiga suraregional “Prima la Musica“ y i raporc deboriada sön le svilup dla cultura é de bugn ejëmpli dla colaboraziun bele esistënta danter i raiuns dl Tirol, dl Südtirol y dl Trentin tl setur cultural. Cun l’acordanza culturala sotescrita tl agost dl 2014 á les trëi provinzies cherié la basa por n barat plü intensif dles politiches culturales tla Euregio. Incö, lönesc ai 29 de jügn s’á i assessurs por la cultura dl’Euregio incunté a Desproch sön invit dl’assessuria por la cultura dl Tirol Beate Palfrader.
L’assessur por la cultura ladina Florian Mussner á sotligné che le messaje de na planificaziun culturala deboriada reverda dantadöt le imparé da conësce di lingac y dles cultures vijines, „por costruí adöm n’idea y n messaje de n Europa cun na pluralité de cultures che renforzëia la colaboraziun, dantadöt por i jogn y les jones, sura i confins fora.“ L’assessur por la cultura taliana y vizepresidënt Christian Tommasini, che é gnü rapresenté dal diretur dla Repartiziun Cultura Antonio Lampis, á sotligné che por merit dl’Euregio pó le Südtirol ester tres de plü n punt de lian danter le Süd y le Nord. L’assessur por la cultura todëscia Philipp Achammer á recordé tratan l'incuntada che „l’Euregio sará ma te chël momënt n proiet che funzionëia canche i zitadins y les zitadines sintiará süa presënza y i vantaji dla colaboraziun cun i raiuns vijins. Porchël é nosta intenziun da realisé vare por vare l’acordanza culturala sotescrita l'ann passé.“ Ince l’assessuria dl Tirol Palfrader á recordé che tres la colaboraziun culturala tl Euregio vëgnel renforzé l’identificaziun di zitadins cun le proiet europeich. Por le Trentin á tut pert al’incuntada l’assessur por la cultura Tiziano Mellarini che á confermé le sostëgn da pert dl Trentin, dantadöt tres les ressurses tecnologiches dl portal "trentinocultura" por la realisaziun de na plataforma culturala nöia.
Tres l’acordanza sotescrita l’ann passé á n grup de laur cun rapresentanc dles trëi provinzies metü adöm na seria de critérs tres chëra che al podará gní sostigní proiec culturai dl’Euregio. Implü laora bele le grup por aumenté le barat d’informaziuns y conescënzes. Na ghiranza prinzipala dles trëi provinzies é ince chëra da dé jö proiec culturai adöm por aumenté les poscibilités de azetaziun da pert di ejaminadus dl proiet de sostëgn europeich „Creative Europe“. Tla planificaziun él ince bele n calënder cultural dl’Euregio, olache al gnará presenté les scomenciadies de düc trëi i raiuns. Tratan l’incuntada él ince gnü debatü di proiec che reverda la jonëza, por ejëmpl de n'orchestra di jogn y de n zënter dla musiga dl’Euregio a Toblach.
rc
Galaria dales fotografies
