Dala Junta: Dolomites UNESCO, grup de laur cun esperc dl setur
Ince les Dolomites patrimone mondial UNESCO é stades tl zënter dla reuniun da incö (30 de jügn) dla Junta provinziala. Le govern provinzial á tut la dezijiun da istituí n grup de laur d’esperc por le monitoraje dl’atuaziun di obietifs strategics tla pert südtiroleja dl patrimone sconé dal UNESCO. Aprová ince i 100mile euro de spëises aministratives por le 2015.
„Do la nasciüda dl proiet dles Dolomites patrimone mondial UNESCO tl ann 2009 – sotlignëia l’assessur competënt Richard Theiner - s’á i ciamps d’intervënt slarié fora a na seria ampla de seturs. Por podëi coordiné damí i seturs desvalis ún tut la dezijiun da istituí n grup de laur che gnará coordiné dai responsabls dl Departimënt provinzial por le svilup dl teritore, dl ambiënt y dl’energia.“ Dl grup de laur fajarál pert, adöm ai rapresentanc dl Departimënt, ince rapresentanc dl Agenzia de Südtirol Marketing, dl’Area funzionala dl turism dla Provinzia, dl’Agenzia provinziala por la mobilité, dla Repartiziun Mobilité, dl Sorvisc Strades, dl Ofize geologia y dl Geoparch Bletterbach. Al podará ince gní damané la partezipaziun de atri ofizi dla Provinzia y de mëmbri dla Fondaziun Dolomites UNESCO.
Le compit prinzipal dl grup de laur sará chël de monitoré l’atuaziun dles mosöres por che la Provinzia pois arjunje i obietifs y les diretives scrites dant dal’UNESCO. Implü podará i rapresentanc fá propostes sön mosöres che reverda le trafich, le marketing turistich y la sconanza dl ambiënt y dla contrada. Le presidënt dla Provinzia Arno Kompatscher á prezisé inant che „la Junta provinziala á aprové 100mile euro por curí les spëises aministratives che reverda le 2015, conscidran che la cuota dla Provinzia fej fora n cuarto di cosć por le funzionamënt dla Fondaziun Dolomites UNESCO. Implü gnarál ince metü a desposiziun mesi finanziars dal Fonds di comuns vijins, deache na pert dl raiun sot a sconanza é propi dlungia nosta Provinzia.“ Dla fondaziun, nasciüda ai 13 de ma dl 2010, fejel pert les provinzies de Balsan, Trënt, Belun, Pordenone y Udine, sciöche ince les döes regiuns dl Venet y dl Friul-Aunejia-Iulia.
rc
