Dala Junta: Aprovada la strada por rové al Plann sanitar provinzial
Le svilup y l’impostaziun nöia dla prevenziun y dl’assistënza sanitara tl Südtirol é i obietifs prinzipals dl Plann sanitar provinzial nü 2016 - 2020 che gnará realisé ti proscims mëisc. Sön la basa dles informaziuns portades dant dal’assessuria Martha Stocker á la Junta provinziala aprofondí incö (ai 30 de jügn) i proscims vari che reverda l’elaboraziun dl documënt strategich.
Do l’aprovaziun dl model de Assistënza sanitara Südtirol 2020 reverda le proscim vare l’elaboraziun dl Plann sanitar provinzial nü che sará le stromënt prinzipal por n’impostaziun nöia dl’assistënza sanitara dl Südtirol. Le Plann sanitar provinzial 2016 – 2020 sará le documënt strategich por le coordinamënt y la reorganisaziun di sorvisc y dles prestaziuns de sconanza y de promoziun dla sanité. „Cina sëgn gnô le plann dal 2002 inant renové vigni trëi agn, nosta intenziun é sëgn da mudé la lege por porté la dorada a cin’agn“, á dit l’assessuria por la sanité Martha Stocker do la sentada dla Junta.
Colaboradus dl setur sanitar, assoziaziuns d’interes y les organisaziuns soziales, mo ince organisaziuns di paziënc, di Comuns y di zitadins podará tó pert te plü ocajiuns al’elaboraziun dl program de svilup dl setur sanitar dl Südtirol. Ai podará porté dant propostes che gnará spo valutades da n grup de esperc por ci che reverda la poscibilité de realisaziun y de inserimënt tles diretives generales dl plann. Sciöche pröm vare laurará sëgn fora n grup de esperc la basa dl plann tres n'individuaziun di ciamps d’intervënt di seturs sanitars interessá, danter chisc la reorganisaziun clinica, l’assistënza sön le teritore, la prevenziun y la reabilitaziun.
Do che la Junta provinziala ará aprové chisc indicadus de basa, metará spo i grups de laur man da definí i programs desvalis. Operadus sanitars, assoziaziuns d’interes y les organisaziuns soziales podará tó pert concretamënter a chësta fasa, por ejëmpl tres workshops y chestionars.
Cina la fin dl ann 2015 gnarál spo stlüt jö les consultaziuns y presenté i resultac. Ince les propostes d’integraziun da pert di Comuns y dl’opiniun publica gnará tutes en conscidraziun tl Plann sanitar nü y che gnará aprové, insciö l’assessuria Stocker - alplü tert te setëmber dl ann 2016.
rc
