Temperatöres altes tl Südtirol: i consëis dla Proteziun zivila
I meteorologs dla Proteziun zivila provinziala prevëiga por i proscims dis temperatöres dër altes tl Südtirol. La Proteziun zivila inviëia la popoluaziun a se tigní a n valgönes regoles scëmples che reverda i ambiënc interns, la proteziun dl corp, la sté alaleria y i iadi cun l’auto.
Te n valgönes zones dl Südtirol sarál poscibl ti proscims dis da rové cina 40 degrá. Les temperatöres cialdes é tl rové adalerch dal Africa dl Nord y pó resté te Südtirol por plü dis. La popolaziun é damanada da s’informé y da s’arjigné ca se tignin a n valgönes regoles scëmples. La Proteziun zivila recorda che por smendrí les temperatöres al’intern di frabicac y di ofizi él debojëgn da baraté fora l’aria ma un n iade dadoman y un n iade da sëra, tratan le de él poscibl da diminuí la temperatöra al’intern s’anuzan de coltrines. La temperatöra ideala da imposté sön n sistem dl l’aria frëida é dai 25 ai 27 degrá, sce an adora n ventiladú él aconsié da ne le posizioné nia diretamënter cuntra le corp.
N consëi d’ütl é ince chël da se fá la duscia da doman y da sëra cun ega ciöbia y da se lavé le müs, le col y les mans cun ega frësca mo nia frëida. Al ne é nia aconsié da jí alaleria dales 12.00 ales 18.00 domisde y da ne fá nia eserzizi fisics che damana do gragn sforc - sce ara ne vá nia atramënter, spo ma cun na proteziun dl cé y cun guant lisier. Al é important da bër tröp, da mangé tröpa ordöra y da evité boandes cun alcol y cun cafeina.
Düc i aparac d’eletronica che ne vëgn nia adorá dess gní destacá. Por evité situaziuns critiches tratan i iadi cun l’auto él important da s’informé denant y da avëi tres assá ciarburant tl tanch, ince por podëi lascé l’auto y le sistem dl aria frëida impié sce an ess da rové a architades plü lungies sön autostrada. Sce an é sön le iade cun l’auto y la ferata él important da avëi tres para les cosses plü ütles por i tëmps de speta (ega, mangiaries, medejines, ecc.), dantadöt sce an viajëia cun mituns, seniors o amará.
Les zones plü cialdes sará dantadöt ti raiuns de Balsan, dl Unterland, dl Etschtal, tla Val d’Isarch y tles cités. Ince tles atres zones plü „bases“ sará les temperatöres plü altes co le valur mesan, les zones da munt restará indere plü sconades dai efec dl cialt. Les temperatöres plü cialdes pó ester n risch dantadöt por i seniors, porsones cun dificoltés de sanité, mituns y viadus. Insciö é la probabilité de riscs por la sanité plü alta sce les periodes de cialt é plü lungies, co sce le fenomen reverda ma dis singui cun les medemes condiziuns meteorologiches. Na mapa interativa cun les temperatöres atuales dl Südtirol pon ciafé sön la plata internet dl sorvisc meteo dla Provinzia. Atres informaziuns d’ütl pón ciafé por talian y todësch.
rc
