Renforzé les families: l’Agenzia Familia sostëgn i proiec de consulënza
Tl contest dl proiet „Renforzé les families“ sostëgn l’Agenzia Familia de plü proiec di zëntri de consulënza dles families che ti vá dantadöt a bëgn de erës en gravidanza y por do la nasciüda, pers jogn, families te situaziuns de crisa, en separaziun y cun mituns te n'eté jonila. I obietifs é da renforzé les competënzes educatives, la prevenziun y aiüc te situaziuns de dificoltés particolares.
Un di trëi obietifs prinzipai dla politica familiara dla Provinzia é le sostëgn preventif dles families. Por realisé chësc fin á n grup de laur coordiné dal Departimënt Familia elaboré n proiet che prevëiga l’acompagnamënt, la formaziun y la consulënza abonora dles families, mo ince la costruziun de na rëi de esperc cun n’oferta diretamënter söl post. „I orun garantí la presënza sön döt le teritore de ofertes azesibles che s’orientëia ai debojëgns dles families, pian ia dal’esperiënza de chi che é bele atifs te chësc setur“, sotlignëia l’assessuria por les politiches familiares Waltraud Deeg. „I proiec te chësc ciamp reverda dantadöt i mituns dai 0 ai 3 agn, la puberté y les situaziuns de separaziun de geniturs“, insciö Deeg.
Indöt sis zëntri de consulënza te döt le Südtirol ti pita ai zitadins proiec spezifics che vëgn sostignis economicamënter dal’Agenzia por les families. „I pröms proiec é bele piá ia cun i pröms mëisc dl ann 2015 y ai jará inant cina da d’altonn“, spliga Deeg. Por sostigní les umes tratan la gravidanza y do la nasciüda á le zënter de consulënza dl AIED metü man cun n proiet de prevenziun y de acompagnamënt di caji de depresciun post partum. Le zënter de consulënza dla Mesocops á na portina aposta dedicada a consulënzes por families cun mituns tla puberté y tl’eté dai 10 ai 18 agn. Al vëgn pité implü consulënzes y incuntades por families te situaziuns de crisa y de separaziun. Por promöie les competënzes di geniturs y dantadöt di pers jüs indalater mët le zënter de consulënza "Ehe- und Erziehungsberatung Südtirol" a desposiziun da öna na pert incuntades en grup por i adulc y dal’atra pert ince scomenciadies por i mituns. Le zënter de consulënza Kolbe é indere spezialisé da aconsié pers jogns che á intenziun da mët sö familia, che é te na situaziun de crisa, o che mëss se dé jö cun i cambiamënc do la nasciüda o che é te situaziuns de separaziun y de conflit.
La formaziun y „l’ester geniturs“ en general, dantadöt por ci che reverda i peri y i geniturs „susc“ é tl zënter dl proiet de acompagnamënt pité dal zënter de consulënza da Balsan „L’Arca“ che prevëiga de plü scomenciadies de educaziun por „ester geniturs“. Le zënter de consulënza Lilith de Maran se dedichëia inultima al renforzamënt di raporc te familia por evité situaziuns de crisa y por renforzé les competënzes di geniturs y la relaziun danter i geniturs y mituns. I zëntri de consulënza é finanziá por le 70 porcënt dala Provinzia, le cuota che resta vëgn garantida da sponsors y tres donaziuns.
rc
