Descurí le monn dles laurs di andri adöm cun le Museum Ladin
Le Museum Ladin Ursus ladinicus a San Ćiascian y l'Ofize Parcs naturai pita cina ai 24 de setëmber vigni jöbia na jita acompagnada cina sö dal ander de Conturines, olache an á ciafé tl 1987 i resć dla laurs di andri Urus ladinicus. Cina ai 27 d'agost vëgnel ince organisé jites acompagnades cun n espert tl Museum a San Ciascian che spliga le monn dla laurs di andri y sües particolarités.
Ai 23 de setembër dl 1987 á le hotelier y mënacrëp Willy Costamoling da Corvara metü pé por le pröm iade tl ander de Conturines a 2.800 metri sura le livel dl mer, olache al ê perts de n schelet dla laurs preistorica che á viüt dan da presciapüch 40.000 agn. Por descurí la storia dla Laurs dolomitica pita le Museum Ladin Ursus ladinicus da San Ciascian adöm al Ofize Parcs naturai döes scomenciadies al’edema por ghesć y jënt interessada dal post. Cina ai 24 de setëmber vëgnel metü da jí vigni jöbia danmisdé na jita acompagnada de set ores cun les colaboradësses y i colaboradus di parcs naturai al ander de Conturines a 2.800 metri d'altëza. Le punt d'incuntada por la jita, de n livel alt de dificolté cun passa 1.000 metri de deslivel, é la Capanna Alpina (1.726 m) dales 08:30; an röia zoruch dales cater domisdé zirca.
Tres de jöbia pita le Museum Ladin Ursus ladinicus cina ai 27 d'agost dales 16 domisdé (por todësch) y dales 17 (por talian) na vijita acompagnada dl museum cun esperc che spliga le monn dla laurs di andri, sües particolarités y sü socrëc. Implü vëgnel ince splighé i aspec plü importanc dla geologia dles Dolomites y dl'eté dles dlaciaziuns.
La jita costa 7 euro; adöm cun la vijita tl museum domisdé 5 euro. Por la jita acompagnada mësson se prenoté pro les assoziaziuns turistiches dla Val Badia. La vijita tl Museum Ladin Ursus ladinicus costa indere diesc euro y an mëss se prenoté tl Museum Ladin al numer de telefonn 0474 52 40 20. Cun la medema cherta vara ince da jí a ti ciaré al Museum Ladin Ćiastel de Tor.
De plü informaziuns ciáfon tl Museum Ladin Ćiastel de Tor, Strada Tor 65, San Martin de Tor, Tel. 0474 52 40 20 y sön internet sot www.museumladin.it/la.
rc
Galaria dales fotografies
