Dala Junta: Informatica, löm vërda por n percurs unitar y grups de esperc
La Junta provinziala á aproé incö (07/07) la proposta dl’assessuria por l’informatica Waltraud Deeg che reverda na gestiun unitara dl setur publich dl IT. Na rëi danter ënc interns y sura-isituzionai adöm cun grups de esperc é la rezeta conscidrada adatada por svilupé inant le setur informatich dl'Aministraziun publica y por garantí n barat costant cun l’economia privata y le monn dla formaziun.
La reorganisaziun dl setur IT dl’aministraziun provinziala é na priorité strategica dla Junta provinziala y prevëiga la creaziun de na gestiun de coordinaziun unitara dl setur dl’informatica. Incö, mertesc ai 07 de lugio, ti á l’assessuria por l’informatica Waltraud Deeg presenté ala Junta provinziala na proposta de formaziun de na rëi de gestiun unitara danter plü istituziuns che é gnüda aprovada dala Junta y pó sëgn gní realisada. „Cun la strategia digitala Südtirol 2020 á i suranstanc dl’Aministraziun publica, adöm ai responsabls di seturs dl’economia y dla formaziun, definí n percurs prezis dl svilup digital dl Südtirol, la delibera aprovada incö é la basa por l’atuaziun de chësc program“, á splighé l'assessuria Deeg.
La proposta prevëiga insciö la creaziun de na rëi cun plü ënc y de grups de esperc, partis sö aladô dles competënzes y che se crüzia danter l’ater dl’impostaziun strategica dl svilup dl'informatica, dl’atuaziun concreta dles mosöres y dla programaziun generala y de dorada lungia.
La linia strategica prinzipala gnará dada dant insciö da n grup de esperc (le „governance board“) formé dal’assessuria Deeg, dal diretur general dla Provinzia y dai suranstanc dl Consorz di Comuns, dla Regiun y dl’Aziënda sanitara provinziala che sará ince i responsabli por la spartida di investimënc y la creaziun di programs anuai. L’atuaziun dles mosöres stabilides sará le compit prinzipal de n ater grup de esperc (dal inom „steering board“) che ará ince la responsabilité da fá propostes por mioré le sistem informatich dl’aministraziun publica. Chësc ënt strategich sará formé dal diretur y i suranstanc dla Repartiziun Informatica dla Provinzia, dla SIAG, dl Consorz di Comuns y dl’Aziënda sanitara. Implü gnarál ciamó formé n grup de laur che se crüziará dles priorités dl svilup dl’informatica tl’Aministraziun provinziala y che fajará na proposta por le plann trienal che sará la basa di planns de dötes les aministraziuns publiches.
Por jí inant cun la colaboraziun cun i auturs esterns planifichëia l’assessuria Deeg implü na mësa cun esperc por n barat de minunghes costant cun les assoziaziuns economiches y cun la Ciamena dl Comerz „por aprofondí les sfidades che reverda l’economia locala y l’anuzamënt de tecnologies nöies por aumenté la competitivité“. Na mësa torona spezifica cun plü esperc dess ince gní ativada por analisé la cultura digitala, dantadöt por ci che reverda les profesciuns nöies che s’á formé tl setur informatich.
rc
