Dala Junta: critérs tlers por la costruziun y finanziamënt de transiamënc
La Junta provinziala á aprové incö (ai 7 de lugio) i critérs por manajé les tröpes domandes di Comuns ala Provinzia por la realisaziun y le finanziamënt de transiamënc zircolars sön les strades statales, provinziales y comunales. Insciö gnará tl dagní ma plü finanziá y realisá completamënter dala Provinzia i transiamënc conscidrá „de interes provinzial“ y che respetëia düc i critérs stabilis.
Conscidran les tröpes domandes presentades dai Comuns ti ultims mëisc á la Junta provinziala tut la dezijiun da definí critérs tlers por stabilí les dimenjiuns dl finanziamënt da pert dla Provinzia por la costruziun de transiamënc zircolars. I assessurs Christian Tommasini y Florian Mussner á metü adöm n grup de laur formé dai tecnics por stabilí avisa i caji de transiamënc zircolars „de interes provinzial“ che pó gní finanziá al 100 porcënt dala Provinzia. „La Junta á prezisé la definiziun de interes provinzial y metü sö critérs tlers che vigni proiet messará respeté“, á dit le presidënt Arno Kompatscher. La dezijiun gnará formalisada tla proscima sentada dla Junta provinziala.
De „interes provinzial“ él düc i transiamënc zircolars de dötes incrujades danter strades statales, de dötes les incrujades danter strades statales y provinziales y ince danter strades statales y comunales (y strades provinziales y comunales) ti caji olache la strada comunala é l’azes prinzipal ala localité. „Les domandes che corespogn al interes provinzial – spliga i assessurs competënc Tommasini (laurs publics) y Mussner (sorvisc strades) – mëss respeté implü trëi critérs: le pröm criter reverda le trafich (le raport danter le volum dl trafich dles döes strades dl tranisamënt zircolar mëss ester plü alt dl 25 porcënt, almanco 5mile auti mëss passé mesamënter vigni de), le secundo criter reverda la geometria (les dimenjiuns dl transiamënt) y le terzo la sigurté (les incrujades de strades cun tröc inzidënc gnará analisades caje por caje).“ Sce düc i critérs gnará tignis ite pó la realisaziun di transiamënc zircolars gní finanziada completamënter dala Provinzia. Implü él ince preodü contribuc da pert dla Provinzia por le finanziamënt de na pert di cosć dla realisaziun de transiamënc zircolars sce ma na pert di critérs vëgn respetá, y ince degun finanziamënt sce al ne vëgn respeté degun criter.
rc
