Üties da munt, firmada l’acordanza danter Provinzia-CAI-AVS
La Provinzia, le CAI y l’AVS laora da sëgn inant adöm tla prozedöra d’assegnaziun dles conzesciuns por la gestiun dles 25 üties da munt de proprieté provinziala. Incö (08/07) á le presidënt dla Provinzia Arno Kompatscher y i responsabls dl CAI Claudio Sartori y dl AVS Georg Simeoni firmé la convenziun che regolamentëia la colaboraziun y che stlüj insciö definitivamënter n capitul doré de plü agn.
Tl 2011 ê 25 üties da munt passades dala proprieté dl Stat ala proprieté dla Provinzia. Por assegné les conzesciuns de gestiun dles üties â la Provinzia scrit fora n concurs tl 2014, a chël che degügn ne á tut pert. La junta á insciö tut la dezijiun da organisé na colaboraziun danter l’Alpenverein Südtirol y le Club Italiano Alto Adige por elaboré adöm les bandides por vigni ütia, conscidran les conescënzes dles döes organisaziuns te chësc setur. La convenziun danter la Provinzia y les döes assoziaziuns alpinistiches é gnüda firmada incö (mercui ai 8 de lugio) al Palaz Widmann y prevëiga la costituziun de n comitê paritetich, de chël che al fajará pert i presidënc dl AVS y dl CAI sciöche ince i direturs di Ofizi Manutenziun frabicac y Geologia. Le comitê ará i compic da definí les condiziuns dles bandides y da elaboré na lista de priorités di intervënc de manutenziun da fá tles üties da munt. La colaborziun ará na pröma dorada de dui agn y tól ince ite la consulënza por le control dles üties da munt da pert dl AVS y dl CAI tla pröma perioda atira do l’assegnaziun dles conzesciuns nöies. Por curí les spëises dles ativités ti gnarál assegné al CAI y al AVS dötadöm na soma de 40mile euro por i dui agn. La dorada dl afit dles üties sará indere plü lungia co dui agn.
„Por merit dla colaboraziun danter dötes les perts interessades, dal CAI al AVS ai afitadins dles üties, sarál poscibl da regolé la cun chësta acordanza la gestiun dles üties pian ia dal proscim ann 2016“, á splighé le presidënt Kompatscher. L’acordanza pormët ince n salt de cualité dla colaboraziun Provinzia-AVS-CAI, „deache la sconanza dles üties da munt ti stá a cör a döta la jënt che vá sö por munt, ai abitanc dl post sciöche ince ai ghesć“, á ajunté Kompatscher. Le presidënt á sotligné che la Junta á ince dé löm vërda por le program di proscims intervënc de manutenziun y ressanamënt dles üties, che á debojëgn da gní ressanades tresfora conscidran les condiziuns dl tëmp y la posiziun dër alta sön les munts. Al é preodü investimënc por 3,2 miliuns de euro.
Le vizepresidënt dla Provinzia Christian Tommasini (competënt por i laurs publics) á baié de n „passaje important dl plann concret de ressanamënt dles üties mo ince cun n valur simbolich, deache l’acordanza é n segnal de cresciüda de nosta sozieté cun le superamënt de malcapides passades.“ L’assessur por le patrimone Florian Mussner á dit che l’acordanza „sotlignëia i valurs de nostes munts: reziprozité, condivijiun y uniun“ y á recordé che les üties da munt é n travert por düc: dai ghesć di paisc todësc (53%) ai ghesć dala Talia (18%) ala jënt dl post (18%). „Podëi se lascé sön les conescënzes dl CAI y dl AVS é n resultat dër de valüta.“ Ince le presidënt dl CAI Sartori á definí la firma „n’acordanza che pó nes porté ciamó lunc. I ún lascé da pert les chestiuns etniches por lauré deboriada por nostes munts. Sëgn sará la colaboraziun danter CAI y AVS ciamó plü buna.“ Por le presidënt dl AVS Georg Simeoni „él gnü ciafé n compromis de gran valüta che stlüj na chestiun nasciüda dan da 16 agn. L’AVS y le CAI s’á bele metü al laur por se partí sö i laurs de ispeziun y de control dles üties da munt.“
rc
Galaria dales fotografies
