Insegnanc: Assegnaziun di posć por l’ann de scora 2015/2016
Tl’Intendënza Ladina a Balsan gnarál assegné en vëndres ai 7 de agost i posć por stlü jö i contrac a tëmp indeterminé (de rode) y i contrac a tëmp determiné por le personal insegnant de düc i liví dles scores ladines. Düc chi che é interessá é dër bel inviá da tó pert.
L'assegnaziun di posć por l'ann de scora 2015/2016 gnará fata sön la basa dles gradatöres di concursc ordinars che ne é nia ciamó gnüdes tutes ca, dles gradatöres provinziales de esaurimënt y dles gradatöres provinziales nöies.
Dales 9.00 vëgnel partí fora i posć lëdi dles scores elementares.
Dales 10.30 vëgnel partí fora i posć lëdi dles scores mesanes y altes.
I candidac mëss se presenté pro l'Intendënza Ladina, strada Binder 29 a Balsan, cun n documënt d'identité varënt. Sce le candidat ne pó nia gní en chël de, pól se lascé rapresenté da na porsona de crëta cun n'autorisaziun scrita. Al gnará madër partí fora posć a tëmp determiné. I insegnanc che stlüj jö n contrat de rode mëss tratan l'ann de scora 2015/2016 damané l'assegnaziun dla sënta definitiva tres la prozedöra de trasferimënt. I direturs pó impormó mëte man da partí fora les suplënzes sön la basa dles gradatöres d'istitut canche l'assegnaziun di posc tl'Intendënza é stlüta jö. Le numer di posć a desposiziun por l'assegnaziun gnará publicá sön la tofla y sön la plata internet dl'Intendënza ladina al plü tert ai 24 messé dl 2015. I candidac por le post de rode gnará contatá personalmënter. Le personal insegnant che á ciafé n post de rode pó fá domanda por le tëmp parzial cina ai 14 de agost 2015.
SAN
