San Martin: Stlüta jö la dortoraziun dla strada, aumentada la segurëza
I laurs de dortorada dla strada provinziala che porta dal zënter dl paisc de San Martin de Tor al Museum Ladin Ciastel de Tor é gnüs stlüc jö da püch. L’intervënt jô debojëgn por aumenté la segurëza stradala de autisć y peduns. Le cost dl intervënt é de 462mile euro.
Le toch dla strada provinziala tl Comun da San Martin che porta dal zënter dl paisc al Museum Ladin (dal chilometer 42,95 al chilometer 43,44; lunch 500 metri) jô debojëgn da gní slarié fora por aumenté la segurëza di autisć y di peduns. „Tres la sistemaziun dla strada él sté poscibl da eliminé n valgönes perts strëntes y da ti dé ai autisć y peduns n'odüda plü ampla sön le trafich“, á splighé l’assessur por i laurs publics Christian Tommasini che á injunté che la trassa ressanada vëgn adorada tröp, dantadöt tratan l’isté sciöche coliamënt por rové sön Börz, a Longiarü y tres Funes cina Tlüses y Porsenú.
Adöm cun le slariamënt dla strada, sciöche al spliga le diretur di laurs Marco Pinzan dl Ofize tecnich Strades nord-est, él ince gnü realisé n marciapisc sön le pröm toch dla strada ala fin dl zënter dl paisc tla direziun de Restalt. Le marciapisc pita plü segurëza y pó gní anuzé dala jënt dl post y dai ghesć sciöche coliamënt por spaziré y vijité le Museum Ladin Ciastel de Tor tres le tru che porta sön Col. Te chësta zona él implü preodü la realisaziun de n’architada nöia por i mesi dl trasport publich. Tratan le mëis de setëmber gnarál ciamó stlüt jö n valgügn laurs de sistemaziun dla strada.
I laurs é gnüs fac dal’impresa "Ploner s.r.l" por püch deplü co 462mile euro, dl coordinamënt s’á fistidié l’Ofize tecnich Strades nord-est dla Provinzia sot ala direziun dl injenier Gustav Mischí.
rc
Galaria dales fotografies
