Le dagní dl Stelvio: convëgn ai 27/07 cun Kompatscher, Maroni y Rossi
„Lo Stelvio al centro delle Alpi“, chësc é le titul dl convëgn metü da jí dala Regiun Lombardia preodü por en lönesc, ai 27 de messé sön le ju danter la Val Venosta y la Valtellina. Danter i reladus che tolará pert al convëgn sarál le presidënt dla Provinzia Kompatscher, y i surastanc dl govern dla Lombardia Roberto Maroni y dl Trentin Ugo Rossi.
L’incuntada sön le Ju dl Stelvio, a chëra che al tolará pert de plü aministradus locai y rapresentanzes economiches dles provinzies dl Sondrio, de Balsan y di Grijiuns, é dedicada al dagní dl raiun dl parch nazional. Danter i argomënc che gnará analisá él: la gestiun nöia dl Parch nazional, les mosöres de valorisaziun dl Stelvio, le fonds por i raiuns de confin, l’autonomia sciöche motor por le svilup di raiuns da munt. Les contlujiuns di laurs gnará portades dant dal presidënt dla Provinzia Arno Kompatscher.
Le convëgn „Lo Stelvio al centro delle Alpi“ gnará inauguré
en lönesc ai 27 de messé
dales 10.00
sön le Ju dl Stelvio, Hotel Pirovano
dal presidënt dla Lombardia Roberto Marini. Ala fin dl convëgn él preodü la firma dl protocol ala ütia da munt Garibaldi, sciöche acordanza danter la Regiun dla Lombardia y la Provinzia autonoma dl Südtirol por la valorisaziun dl raiun sot a sconanza dl Stelvio.
rc
