Istitut Ladin: pröma incuntada dl Consëi nü, Videsott confermé presidënt
Le consëi d’aministraziun nü dl Istitut Ladin Micurá de Rü é gnü aprové da püch dala Junta provinziala y á albü en jöbia, ai 23 de messé, süa pröma sentada costituënta. Albert Videsott y Bruno Senoner é gnüs reconfermá te sües inciaries sciöche presidënt y vizepresidënt.
Dl Consëi d’aministraziun nü dl “Istitut Ladin Micurá de Rü” fejel pert Albert Videsott sciöche rapresentant dla Junta provinziala, Bruno Senoner sciöche rapresentant dles lies culturales de Gherdëna, Erica Castlunger é tl Consëi por les lies culturales dla Val Badia, Giorgio Costabiei rapresentëia i Comuns dla Val Badia y Gherdëna y Maria Kostner sciöche rapresentanta dl Consëi scolastich ladin. Dl Consëi dl Istitut fejel ince pert l’intendënt dles scores ladines Roland Verra y le diretur Leander Moroder.
Te süa pröma sentada costituënta ai 23 de messé él gnü confermé te sües inciaries Albert Videsott sciöche presidënt y Bruno Senoner sciöche vizepresidënt. “Aladô de disposiziuns nazionales nöies unse messü mudé le statut dl Istitut Ladin y smendrí le numer di aconsiadus da 9 a 6. Por le dagní él preodü de plü mudaziuns tl’aministraziun provinziala che portará ince a mudamënc tl’organisaziun y tla strotöra dl Istitut”, dij le presidënt Videsott che confermëia che öna dles ghiranzes prinzipales dl Consëi restará inant chëra da se fá aldí te düc i liví por garantí inant l’autonomia ampla de gestiun dl program y de planificaziun dles ativités dl’Istitut Ladin ince tl dagní.
L’Istitut Ladin “Micurá de Rü” cun sënta a San Martin de Tor se crüzia dl mantignimënt y dl svilup dl lingaz ladin. Implü á l’Istitut Ladin l'inciaria da dé impulsc importanc por la sconanza dla cultura ladina, da fá crësce les relaziuns cun les atres mendranzes linguistiches y da se crüzié dles publicaziuns che reverda le lingaz y la cultura ladina. Sciöche zënter de competënza ladina, él ince la pröma fontana d’aconsiamënt por la Junta provinziala canche ara nen vá de chestiuns che reverda la cultura y le lingaz ladin.rc
