Ju dl Stelvio, protocol d’acordanza por svilupé deboriada le raiun alpin
„Les munts unësc y ne despartësc nia“: chësc é sté le moto dla sotescriziun dl protocol d’acordanza danter i presidënc dla Lombardia y dl Südtirol, Roberto Maroni y Arno Kompatscher, por valorisé le raiun dl Stelvio cun n’atenziun particolara ai raiuns dl ju y dl Parch nazional. Te chësc contest él ince preodü da fá n stüde de fatibilité por realisé n tunel da anuzé döt l’ann.
Les firmes sön le protocol d’acordanza é gnüdes metüdes a 2.845 metri d’altëza tla ütia da munt Garibaldi, n post da n gran valur simbolich por ci che reverda la colaboraziun danter i raiuns desvalies dl Südtirol, dla Lombardia y dla Val Müstair tla Svizera. Tratan le convëgn, a chël che al á ince tut pert le presidënt dla Provinzia de Trënt, Ugo Rossi, le presidënt dl Comite Fonds comuns confinanc Roger De Menech y le secreter dla Regiun Lombardia Ugo Parolo, él gnü sotligné da plü perts l’importanza dl Stelvio sciöche punt de coliamënt danter les realtés desvalies.
„Les munts mëss lié adöm y nia despartí – á prezisé le presidënt Arno Kompatscher – y chësta acordanza é n ater vare important tl vers de n percurs de na colaboraziun plü strënta cun mosöres concretes ince por le dagní dl Parch nazional dl Stelvio. Ara se trata de na gran oportunité por sconé y por fá conësce les carateristiches de nüsc raiuns alpins cun na gestiun autonoma che gnará tl dagní tres de plü unificada y ampliada.“ Le protocol sotescrit dala Regiun Lombardia y dala Provinzia dl Südtirol prevëiga le svilup de aziuns coletives por svilupé inant les capazités turistiches dl raiun y por valorisé sides le ju co ince le parch natural. Preodü él ince n stüde de fatibilité (finanzié dal Fonds di comuns confinanc) por la realisaziun de n coliamënt tres n tunel danter la Val Venosta y la Valtellina davert por döt l’ann.
„La priorité dl Südtirol é n coliamënt ma por ferates – á ajunté Kompatscher – mo a vigni moda gnará dötes les valutaziuns finales dl stüde analisades naota dal punt de odüda dles conseguënzes sön l’ambiënt.“ Le presidënt Roberto Maroni á te chësc contest ince anunzié che al é planifiché n proiet de coliamënt feroviar danter les localités de Tirano y de Bormio. Maroni á ince recordé l’importanza dla Macroregiun alpina, „na realté europeica nöia tres chëra che les regiuns podará se posizioné tl zënter dl dialogh cun Bruxelles por ghiré adöm plü ressurses por le svilup di raiuns alpins.“Tratan l’incuntada él gnü sotligné le conzet nü dl Fonds por i comuns confinanc (ex Fondo Odi) che á l’obietif da svilupé strategies y vijiuns unitares por i raiuns da munt y che á bele porté ales prömes propostes concretes por la valorisaziun dl raiun dl Stelvio. La pröma mosöra prevëiga insciö la creaziun de n tru da jí a pe incër le grup dl Ortles, la secunda é gnüda portada dant dal presidënt Kompatscher y prevëiga che le „ju dl Stelvio podess se candidé por s’inserí tl patrimone tecnich-cultural dl UNESCO se basan sön les infrastrotöres che reverda la sostenibilité sides tl ciamp dla mobilité co tl setur dl turism.“
rc
Galaria dales fotografies
