Dala Junta: Antizipaziuns dl bonus fiscal por ressanamënc,13 miliuns implü
La Junta provinziala á fat fora incö (28/07) da ajunté 13 miliuns de euro al fonds por les domandes d'antizipaziun dl bonus fiscal por intervënc de ressanamënt dla pröma ciasa. La soma d’imprëst gnará calcolada sön la basa dles detraziuns dles cutes. La gestiun finanziara de chësc intervënt ti é gnüda surandada ala sozieté inhouse dla Provinzia, la „Alto Adige Finance Spa“.
Al 1. de messé dl 2014 él gnü daurí le fonds de rotaziun por domandes d’antizipaziun dl bonus fiscal conzedü dala Provinzia por la restrotoraziun dles prömes ciases. Al se trata de n imprëst zënza fic cun chël che la Provinzia antizipëia les alisiraziuns fiscales preodüdes dal Govern (retüda dezenala, tres na detraziun fiscala dla detlaraziun dles cutes por le 50 porcënt di cosć) ti caji de ressanamënt y de sparagn energetich de abitaziuns privates.
Por finanzié chëstes alisiraziuns, conzedüdes sön la basa dla soma dles detlaraziuns dles cutes, â la Provinzia istituí l’ann passé n fonds de rotaziun cun 12 miliuns de euro, che ess podü gní aumenté sce les domandes ess superé la soma preodüda. „I un registré dër na gran cuantité de domandes do n imprëst y chësc ó dí che nosta mosöra vá tla dërta direziun. Cun chësta mosöra él sté y sarál meso da sostigní inant n setur en dificolté sciöche chël dl frabiché“, sotlignëia le presidënt Arno Kompatscher. La Junta á insciö stabilí incö, ai 28 de messé, da amplié la dotaziun dl fonds cun ciamó 13 miliuns de euro por podëi azeté les tröpes domandes d’antizipaziun dl bonus fiscal.
La Junta á ince autorisé l’assessur por le frabiché abitatif Christian Tommasini da firmé na convenziun danter la Provinzia y Alto Adige Finance Spa, sozieté inhouse dla Provinzia, por ti surandé ala Spa la gestiun di mesi finanziars por la conzesciun di imprësć. L'aministraziun dles domandes, l’ademplimënt di criters y la calcolaziun dla soma d’imprëst gnará manajades inant dala Repartiziun Frabiché abitatif, che ará ince le compit da formulé le contrat por l’imprëst cun i zitadins avantajá dala mosöra.
rc
