Firmada l’acordanza de transiziun por i doturs de medejina generala
L’assessuria por la sanité Martha Stocker á informé incö (28/07) la Junta provinziala sön la contlujiun dles tratatives cun i rapresentanc di sindacac di doturs de basa por ciafé n’acordanza sön le contrat de transiziun por i doturs de medejina generala dl Südtirol.
Cun les firmes sön le contrat d’integraziun y transiziun á la Junta provinziala y i sindacac di doturs de basa metü les fondamëntes por les tratatives ti proscims mëisc, olache ara nen jará da sciacaré fora n contrat d’integraziun nü por i doturs de medejina generala dl Südtirol. „Aladô dles diretives dla reforma dl’assistënza sanitara 2020 é le rode di doturs de familia un di plü importanc, deache ai é la pröma porsona de referimënt y aconsiamënt por i paziënc“, sotlignëia l’assessuria por la sanité Martha Stocker.
Le contrat de tranisiziun jô debojëgn deache la curt dla cassaziun â stabilí che la Provinzia messâ adoré a livel provinzial le contrat nazional por i doturs de medejina generala che regolamentëia ince le paiamënt di doturs. „I un ciafé chësta soluziun dl contrat de tranisiziun deache al ne podô nia suzedé che i doturs ess ciafé da n momënt al ater le 30 porcënt demanco paié“, á splighé l’assessuria Stocker tratan la conferënza stampa do la sentada dla Junta provinziala. Degun mudamënt é sté poscibl por ci che reverda la regolamentaziun statala che prevëiga n limit de 1.500 paziënc por vigni dotur. „Mo te düc i posć olache al ne rovará nia lapró n dotur, podará le numer de paziënc resté anfat. Ti posć olache doturs jogn metará man süa ativité messará le limit de 1.500 paziënc indere gní respeté“, insciö Stocker.
Le contrat d’integraziun concordé cun les organisaziuns soziales prevëiga implü le renforzamënt dla „medejina de grup“: i doturs se organisará insciö te grups cun d’atri doturs por podëi ti garantí tresfora le sorvisc d’assistënza sanitara ai paziënc. Le contrat de transiziun prevëiga inant n sostëgn finanziar por l’insediamënt de doturs jogn. Sön la basa dla mancianza de n barat de generaziuns danter i doturs de familia él nezesciar da atué mosöres prezises por ti jí incuntra a doturs jogn che ó daurí n’ativité tl Südtirol.
Por ci che reverda i sorvisc di doturs de pröm aiüt ne sará le passaje nia tan saurí, spliga Stocker. Atualmënter él plü doturs de familia che fej ince sorvisc de pröm aiüt, por ejëmpl te Gherdëna, tla Val de Puster y tla Val Venosta. „Le contrat statal scrí dant che i doturs messará ciafé n arat positif da dui comités, un dla Provinzia y l’ater dl’Aziënda sanitara, por podëi garantí inant chësc sorvisc“, insciö Stocker che á bele dé l’inciaria da formé i dui comités le plü atira che ara vá por formulé n regolamënt d’autorisaziun. „Chësta regolamentaziun gnará arjignada ca plüssigü ciamó cina setëmber“, á prezisé incö l'assessuria Stocker.
rc
