Politica | 28.07.2015 | 16:01

Dala Junta: löm vërda dal'UE por la strategia dla Macroregiun alpina

A Bruxelles él incö (28 de messé) gnü fat n vare important por le svilup dla Macroregiun alpina che tolará ite indöt 48 raiuns y rapresentará 7 paisc europeics. La Comisciun europeica á insciö aprové le plann d’aziun Eusalp che prevëiga le medemo pëis pro les dezijiuns danter les regiuns interessades y i Stac mëmbri dl UE.

Cun l’aprovaziun dl plann d’aziun por la macroregiun alpina (Eusalp) á la Comisciun dl’UE confermé n punt che vëgn conscidré dër important dal Südtirol. „La strategia Eusalp ne é insciö nia ma n pilaster important por le dagní de nosc teritore mo al condüj ite n sistem de governance nü ince a livel europeich, tres chël che les Regiuns y i Stac rovass a avëi le medemo pëis pro les dezijiuns“, á splighé incö, ai 28 de messé, le presidënt dla Provinzia Arno Kompatscher che á ajunté che chësc vare foss n’atuaziun conreta dl prinzip de sussidiarité y de n azes dal bas che tol en conscidraziun ince i valurs dl’autonomia südtiroleja.

L’aprovaziun da pert dla Comisciun europeica é le pröm vare, le plann d’aziun jará sëgn inant al Parlamënt europeich, al Comite dles Regiuns y al Comite por l’economia y les politiches soziales. „La dezijiun finala ti speta spo al Consëi europeich y i sperun che al dará süa valutaziun ala fin de chësc ann, por podëi mët man cun l’atuaziun tl 2016“, insciö le presidënt Kompatscher.

Dla Macroregiun alpina fejel pert 48 raiuns alpins de indöt 7 Stac: Talia, Austria, Francia, Paisc Todësc, Slovenia, Lichtenstein y Svizra. Al se trata dla cuarta macroregiun fondada a livel europeich.

Le plann d’aziun Eusalp

La proposta dl plann d'aziun é partida sö te trëi ćiamps cun prioritês desvalies d’intervënt: insciö se tratera de mioré la competitivité y la coejiun dla Regiun alpina (tres na politica efiziënta dl marcé dl laur y tres la promoziun dl’inovaziun y dl’abilité de archirida dles aziëndes), de assicuré l’azes dla Regiun alpina y de mioré i coliamënc danter les regiuns (tres la promoziun de na mobilité sostenibla y na rëi plü efetiva danter i zitadins), de aumenté l’ambiënt de vita tla regiun alpina (tres le renforzamënt dles resursses naturales y culturales bele esistëntes, le mioramënt dl’efiziënza energetica, l’incremënt dla produziun de energia renovabla, na maiú segurëza dai prighi naturai y dales conseguënzes dl cambiamënt dl clima).

rc

Galaria dales fotografies